Ногай район администрациясынынъ быйылдынъ ызгы аппарат кенъесинде мобилизация шакырувы ман кеткенлерге эм олардынъ аьеллерине ярдамласув бойынша «Ногайский район» МР администрациясынынъ штабынынъ эм 2022-нши йылда район администрациясынынъ «Яслык» МКУ Яслар орталыгынынъ куллыгы акында соравлар ойласылды.

Шарада район администрациясынынъ аькимбасынынъ биринши орынбасары Х.Саитов, район етекшисининъ орынбасары Б.Ярлыкапов, район Депутатлар йыйынынынъ председатели Р.Байманбетов, Кизлярдагы ДР бойынша Россия ФСБ боьлигининъ куллыкшысы С.Абделов, Ногай районы бойынша Россия МВД боьлигининъ начальнигининъ орынбасары К.Махмудов, авыл аькимбаслары, район организация эм учреждение етекшилери катнастылар.
Йыйыннынъ басында «Балалар – террорга карсы» деген балалар суьвретлер конкурсынынъ енъуьвшилери: А.Насыровага (Кумлы орта мектеби), Н.Сулеймановага (Кадрия мектеби), Н.Кокуровага (Куьнбатар мектеби), Р.Махмудовага (Эдиге мектеби), М.Сартаевага (Кадрия мектеби), Н.Черкесовага (А.Джанибеков атындагы мектеби) грамоталар эм савгаларды С.Абделов пан К.Махмудов тапшырдылар.
Солай ок С.Батыров атындагы саниятлар мектебининъ директоры А.Аджибаев А.Алиевага айырым савга берди.
Муннан сонъ Х.Саитов район администрациясы атыннан сани- ятлар мектеб окытувшылары Э.Махмудовага, А.Акбердиевага, М.Отевалиевага, М.Шалиевага, мектеб директоры А.Аджибаевке, район билимлендируьв боьлигининъ методисти Б.Бекмурзаевке, етекшиси А.Агаспаровага конкурсты уйгынлавда белсенли катнасканлары уьшин Разылык хатлар ыслатты. Йыйында сонынъ биринши соравы бойынша район администрациясынынъ ислери бойынша етекшиси З.Аджиманбетова, экинши сорав бойынша район администрациясынынъ «Яслык» МКУ Яслар орталыгынынъ етекшиси А.Шамбилов шыгып соьйледилер.