Янъыларда Махачкала каласында «Тынышлы Дагестан» деп аталган республикалык кинофестивальдинъ тамамлары келтирилди. Бу фестиваль Дагестан Республикасында 7-нши кере озгарылып туры. Фестивальдинъ бас темасы – терроризмге эм экстремизмге карсы турув.

Фестивальде дагестан киноиндустриясынынъ ваькиллерининъ ислери коьрсетилди. Коьрсетилген ислери арасында толы эм кыска метражлы ойын эм документальли фильмлер, видеороликлер, солай ок телевизионлык репортажлар бар эди. Фильмлердинъ коьрсетуьвининъ узаклыгы бир такыйкадан 60 такыйкага дейим барады.
Енъуьвшилердинъ сырасында – «Шоьл тавысы» республикалык газетасынынъ бас редакторы, режиссер Эльмира Кожаевадынъ документальли фильми «Алданганлар». Бу ис кинофестивальде сыйлы экинши орынды алган.
Документальли фильмнинъ бас темасы – терроризмди савлай дуныя бойынша токтатув, кир идеологиядынъ есирине туьскен яслар акында режиссер юрегиндеги авырувы ман хабарлайды. Бу фильм тек республикамызда, элимизде тувыл, Турция элининъ калаларында да коьрсетилген. Сол фильмди караган яслар ойланарлар эм яшавында дурыс сайлав этерлер деп сенемиз.
Эльмира Юнус кызы Кожаевады сондай уьстинлик пен кутлаймыз эм яратувшылык йолында аьли де коьп енъуьвлер йораймыз.
Г.Бекмуратова,
Россия Журналистлер союзынынъ агзасы.