Быйыл Россия Федерациясынынъ прокуратура органлары туьзилгенли 300 йыл толады. Соны ман байланыста Ногай районынынъ прокуратурасы Билимлендируьв управлениеси мен биргелесте 10-11-нши класслардынъ окувшылары арасында Россия патшалык эм ыхтыяр тарихи бойынша олимпиада озгарды.

Ногай районынынъ прокурорынынъ куллыгын юритуьвшиси Аскербий Дильманбетовтынъ айтувына коьре, олимпиададынъ озгарылувынынъ бас борышы – оьсип келеяткан несилдинъ ыхтыяр маданиятын оьстируьв, патшалык властининъ органларынынъ тармагында прокуратурадынъ тутатаган орынына, онынъ борышларына эс каратув.
Олимпиададынъ енъуьвшиси Куьнбатар авыл орта мектебининъ окувшысы Алим Джумаев болды. Экинши орынга Эдиге авыл орта мектебининъ окувшысы Мадина Нугманова, уьшиншиге – Таьтли-Булак авыл орта мектебининъ окувшысы Диана Кульниязова тийисли болдылар. Енъуьвшилерге дипломлар, разылык хатлар, савгалар тапшырылды.
Бизим хабаршы.
Суьвретте: олимпиада озатаган шак.