Сургут районынынъ Федоровский поселогыннан он бир ясындагы Джанибек Денгизов Тайланд элинде бу йылдынъ карагыс айынынъ 10-12-нши куьнлеринде оьткен муай-тай (тайский бокс) бойынша дуныялык чемпионатында 10-11 яслылар ман куьресуьвде катнасып алтын медалине тийисли этилген.

Янъыларда Бангкоктан ердесимиз Федоровка поселогына алтын медали мен кайтты. Ногай ястынъ тренери «БейБарс» куьресуьв клубынынъ президенти Артур Вагапов болады. 67 шеккиси мен куьрескен Джанибек Денгизов асылы ман Кизляр районынынъ Огузер авылыннан болады. Яс палванды дуныялык бириншилигине бу йылдынъ казан айында Нижегородский областинде оьткен Россия Кубогында эм «Кубок содружествосы» деген Савлайроссиялык турниринде уьстинликли катнасувы бойынша сайлаганлар.
Биз Джанибек Денгизовты эм онынъ тренери Артур Вагаповты бу ярык енъуьви мен ак юректен кутлаймыз эм келеекте де ога бийик етимислерин сагынамыз.
Суьвретте: Джанибек Денгизов.