Янъыларда Ногай, Тарумов эм Бабаюрт районларыннан Ростов каласынынъ ипподромында ат асыллавшылары 2022-нши йылдынъ оныншы ат шабыс шарасында ортакшылык эттилер.

Дагестан делегациясынынъ сыйлы конакларынынъ бириси Токиода оьткен олимпиада чемпионы Альберт Батыргазиев болды. Дагестаннынъ атлылары тийисли тамамларын коьрсеттилер.
Каракас деген аргымагы енъил болмаган базласувда «Эдил йылгасынынъ баргысы» деген атшабыс номинациясында енъуьвши орынына тийисли этилди. Каракас аргымагы 1 мынъ 400 метр шакырым ерге дейим шавып, уьшинши орынды бийледи. Атшабыстынъ сонъында 6-ншы кере шабысувда Джебе Пинк эм Лорд Маэстро деген дагестан атлары «Досманбет Азавлыдынъ сыйына баргы» деген айырым номинациясында биринши эм экинши орынларына тийисли этилдилер. Лорд-Маэстро Ново-Дмитриевка авылыннан Темирбек Исмаиловтыкы болады.
1 мынъ 200 метр шакырым ерге дейим шабувда эки ясарлык аргымаклар ортакшылык эттилер. «Эдил йылгасынынъ баргысы» деген номинациясынынъ баргы фондын 60000 маьнет, а «Досманбет Азавлыдынъ сыйына этилген баргыдынъ» 50000 маьнет акша туьздилер. Ызгы баргыдынъ спонсорлары «Куьнбатар» деген ат спорты бойынша клубыннан дагестан ат асыллавшылары болдылар.
Ростов ипподромынынъ асыллав боьлигининъ етекшиси Наталья Гарбузова Дагестаннынъ «Куьнбатар» деген ат спорты бойынша клубынынъ тийисли аьрекетин эм ат иелерининъ де, савга иелерининъ де нызамлыгын белгилеп булай деди: «Клуб иелери атларды баьри керекли затлар ман канагатлайдылар. Олар витаминлер, косымша азыклар бередилер. Сол зат, боьтен де, атшабысувлар шагында бийик етимислерге етисер уьшин бек маьнели болады».
Атшабыста «Куьнбатар» ат спорты бойынша клубынынъ мастер-жокейи эм тренери Станислав Гончаров та ортакшылык этти эм баргылы орыннынъ иеси болды. Онынъ соьзи мен атлар – ол тап балалардай. Бир ерлерде оларга акырасынъ, бир ерлерде парахатландырасынъ, мактайсынъ. Айванларга карав – ат сарайында тазалыкты саклав эм онынъ артыннан карав болады.