Мага Енъуьв байрагынынъ кайдай маьнелиги бары акында айта берип, мен, халкымыздынъ тарих бетлерине коьмилип, согыс йылларда болган каты урыслар акында хабарламага ниетленмей, меним юрегиме тийген, ян тоьримде ыз калдырган уьйкен атайымнынъ бактысы акында айтар эдим.
Меним уьйкен атайым – Дильманбет Маушевич Насыров (ол 1911-нши йыл тувган) Уллы Октябрь революциясы йылларындагы балалар несилиннен. Ол Терекли-Мектеб авылында тувып-оьскен, сол заманларда ерли мектебте тек уьш классты кутармага эп болган. Сондай баслангыш класс билими болган уьйкен атайым колыннан келген туьрли аьрекет пен каьрлеген эм армаган яшав оьмирин бардырган.
Уллы Аталык согысы басланганда, уьйкен атайыма, аьелин, доьрт ясындагы кедесин калдырып, фронтка кетпеге, Ростов туьбиндеги Волгоград каласында явга карсы урысларда катнаспага туьсти. Ол, тувган Элимизди каарлы душпанлардан коршалавга шыкканлардынъ сырасында болып, доьрт йыллар узагында согыс урыслар йолларыннан оьткен эм, наьсипке, каты яраланувлар алса да, согыс кутылып, немец фашистлер тувган еримизден кувылган сонъ, уьйине кайтып келген.
Соьйтип меним уьйкен атайымдайлардынъ йигитлерше куьресуьви мен бизим элимизде парахатлык, тынышлы яшав туьзилген. Баьриси мен бирге атайым бузылган калаларды эм авылларды, авыл хозяйстволык объектлерди кайтадан тургызув ислеринде кыйын салган. Онынъ солай ок бав оьстируьв мен байланыслы талаплыгы бар эди, бавшы аьрекети мен де каьрлеген заманлары болган, «Тезлик ярдамы» коьлигининъ айдавшысы болып та кыйын салган. Тийисли тыншаювга дейим де ерли больницасында куьзетши болып ислеген.
Уллы Аталык согысында катнасканы оькиметимиз ягыннан белгиленмей калмады: ол бир неше медальлерге эм экинши дережели ордени мен савгаланган, Уллы Аталык согысынынъ 40 йыллык мерекеси сыйына атайыма аты ман саьат савкатлаганлар.
Йыл сайын атайым район орталыгы Терекли-Мектеб авылында 9-ншы Май байрамы сыйына озгарылатаган парадта ортакшылык эткен. Сол куьн райбольница куллыкшылары сыйлы согыс ветераны – уьйкен атайымды кутлап келетаган эдилер. 1989-ншы йылда атайым дуныядан кешип кетти.
Уьйкен атайым Дильманбет Насыровтынъ бактысы акында коьп билмесем де, мен оны ман эм согыс азабын шеккен онынъ аьели мен бек оьктемсиймен.
Енъуьв байрагы – ол эстелик эм эске салув, ата-бабаларымызга разылык эм аьлиги несилге асабалык. Енъуьв байрагы – ол оьктемликтинъ, уллы элимиз халкларынынъ бирлигининъ белгиси.
Амина Ильясова,
9-ншы класс окувшысы (Карагас авылы).
