Йылдан-йылга кете береди заман туманлары ишине бизден 1945-нши йылдынъ 9-ншы Май куьни. Ол, бир соьзсиз де, оьткен ХХ оьмирдинъ энъ маьнели тарих оьзгериси болады. Буьгуьнлерде сол 1940-ншы йылларда элимизде уьстине аьскерши шинельлерин кийген 34 миллионнан артык аьдем (ишинде 2500 ногай йигитлери де бар) саналганы белгили. Олардынъ да 8,6 миллионы сол Уллы Аталык согысынынъ дав майданларында дайымга калган. Дав кырларыннан кайтып келген аьскершилер патшалыгымыздынъ экономикасын, халк хозяйствосын кайтадан аягына тургызганлар. Бизим атайларымыз бан аталарымыздынъ бактысына айлак та авыр йолларды оьтпеге туьсти.
Сол 1945-нши йылдынъ язлыгында Совет Союзы фашизмди токтатпага болатаган дуныяда ялгыз бир эл болып шыкты. Уллы Аталык согысында халкымыздынъ ян берклигининъ уллылыгы, онынъ баьтирлиги, яшав уьшин талпынувы эм оьз Аталыгын аман саклав уьшин оьзи-оьзин курман этпеге аьзирлиги яркырап келип коьринди.
Оькинишке, фашизм дуныя юзинде толы кебинде йок болмаган. Бизим заманларда, 2014-нши йылда, нацизм бизге конъысы кардаш Украина патшалыгында басын коьтерип, сонынъ асыл яшавшылары – Донбасстагы, Лугансктагы, Запорожьедеги, Херсондагы тыныш яшап турган халкка карсы оьзининъ савытын онълап, оларды оьлтирип баслаган эди. Сол себептен, Россия Президенти Владимир Путин солардагы (эндигиси бизим Россия сырасындагы) яшавшыларды коршалав ниет пен озган 2022-нши йылдынъ басында украин фашистлерине карсы россия аьскерлерининъ специальли согыс операциясын басламага амалсыз болды. Буьгуьнлерде бизим ясларымызга 1940-ншы йыллардагы атайларындай эм нагашатайларындай болып тувган Аталыгын эм соны ман бирге сав дуныяды нацизмнен коршаламага туьсти. Сол узактагы йыллардагындай болып, олар да: «Бизим исимиз онъ, душпан бузгышланар, Енъуьв бизики болаяк!» – деп беркитип айтадылар. Биз оларга, енъуьвшилердинъ уныкларына эм немерелерине, сенемиз эм олар ман бирге: «Енъуьв бизики болаяк!» – деп кайтаралаймыз.