А-Х.Джанибеков атындагы мектебинде Аталыктынъ баьтирлерининъ куьнинде «Ердеслерим баьтирликлери мен белгили» деп аталган йолыгыс уйгынланды. Шарада согыс спецоперация катнасувшыларынынъ ата-аналары, бу мектебтинъ окытувшысы Адильбек Мурзабековичтинъ анасы Бекбике Дуйсенбиева, йигитше согыс спецоперациясында янын берген Амирхан Мурзагельдиевтинъ атасы эм тетеси – Камиль Мурзагельдиев эм Бекбийке Кулунчакова, Джамалдин Отегеновтынъ анасы – Кайтархан Юсуповна, Рамберди Оразниязовтынъ анасы Сыйлыхан Оразниязова, янъыларда ян берген Алибек Шамсудиновтынъ абасы Диана Рашидовна, солай ок Ногай районында орынласкан аьскер боьлигининъ куллыкшылары ортакшылык эттилер.
Шарады ашаятып, мектеб етекшисининъ тербиялав иси бойынша орынбасары Эльмира Суюндикова аьли Россия патриотлары Уллы Аталык согысы йылларындагындай керекли экенин белгиледи. Бу куьнлерде де элимиз эм элимизде яшаган аьдемлердинъ келеектегиси уьшин урыслар юреди.
Йолыгыс юритуьвшилери юнармеецлер Хансолтан Эспергенов эм Сабина Сабутова согыслардан бос дуныяда яшамага суьетаганлары акында айттылар. Олардынъ соьзлери мен, баьри заманларда да баьри халклар оьз элин коршалаганлар, сога коьре биз де оьз Элимизди суьймеге керекпиз. Бизим аьр кайсымызда аьскершидинъ юреги яшайды.
Соьйтип юнармеецлер оьлимсизликке абыт алган ердеслеримиз – Амирхан Мурзагельдиев, Кайтарбий Елманбетов, Алибек Шамсудинов акында хабарладылар. Окувшы Азизат Аджигельдиева «Памяти всех погибших» деген ятлавын баьрининъ де юрегине тийип окыды. Соьйтип, «Встанем..» деген йырына аьзирленген видеоролик аьр кимнинъ янын сызлатты. Йыйылганлар тыныклыкта тындылар. Бирев де оны бузып болмады, неге десе сондай да янларына етти бу такыйкалар.
Йолыгыс барысында 10-ншы «а» классынынъ окувшылары согыс спецоперация катнасувшылары Джавад Мамутовтынъ, Джамалдин Отегеновтынъ, Арсен Ярикбаевтинъ, Рамберди Оразниязовтынъ эм Арсен Махмудовтынъ йигитлиги акында хабарладылар.
Кайтархан Отегенова, баьри конаклардай болып, бу йылы соны ман бирге юрекке тийген йолыгыс уьшин савбол айтты. Ол йиени Кайтарбий Елманбетов акында оьз эскеруьвлери мен боьлисти.
Эльмира Суюндикова согыс спецоперациясында катнасып турган йигитлердинъ ата-аналарына, оьз Элининъ тийисли патриотларын эм шынты эрлерди тербиялаганлары уьшин уьйкен савбол айтты эм олардынъ баьрине де шыдамлыкты, тез арада увыллары уьйлерине аман-эсен келгенин йорады.
Биз оьз Элимиздинъ баьтирлерин билмеге, эсимизде сакламага эм оьрметлемеге борышлымыз. Баьтирдинъ аты халкынынъ эсинде оьмирге яшайды.
