Янъыларда Геметюбе авылынынъ аькимбасы Кураш Аджигишиев республика бойынша 5-нши ТОКС слетынынъ катнасувшылары ман йолыгысты. ТОКС-тынъ белсенли катнасувшылары Бабаюрт районынынъ мектеби атыннан Махачкалада уйгынланып оьткен 50-нши ТОКС-тынъ республикалык слетында катнастылар. Мектебтинъ ТОКС етекшиси, тарих илмилерининъ кандидаты Разият Амангуловадынъ айтувы ман, Дагестаннынъ баьри районларыннан слетка юзден артык куьплери келген эдилер.
Слетты Дагестаннынъ Оькимети, Дагестаннынъ Билимлендируьв эм илми министерствосы, Дагестаннынъ яслар ислери бойынша министерствосы, Дагестан Республикасы бойынша илмилерининъ киши академиясы, ТОКС-тынъ республикалык штабы уйгынлаган эдилер. Слет Ленинский комсомол атындагы паркында «Эс вахтасынынъ» ашылувына каратылган шатлыклы митингтен басланды. Шарадынъ шатлыклы кесегиннен сонъ, ТОКС-шыларга музейде «Россия – меним тарихим» деген экскурсия уйгынланып оьтти. Оннан сонъ музейдинъ актовый залында ТОКС-шылар куьплерининъ куллыгы акында эсап беруьв конференция уйгынланып оьтти. Слет республика бойынша яслык орталыгынынъ залыннан коьрсетилуьви мен бардырылды. Оннан сонъ яс ТОКС-шылардынъ оьткен йылдагы ийги излестируьв куллыклары коьрсетилдилер. Геметюбе авыл ТОКС-шылары «Бабаюрт районыннан Брест коршалавшылары» деген тема бойынша соьйледилер. Слет яс ТОКС катнасувшыларынынъ юреклеринде терен сезимлерин калдырды.
– Авылымызда илмиге, билимге, излестируьв куллыгы ман каьр шеккен балалардынъ болганы ман бек оьктемсиймен. Мен авылымыздынъ белсенли аьрекетшилерин, ясларын кайсы яктан да демевлеп келеекпен. Балалар – бизим келеектегимиз болады, – деди К.Аджигишиев. Йолыгыстынъ сонъында Геметюбе авыл аькимбасы Кураш Кайтарович Геметюбе авыл орта мектебининъ белсенли ТОКС катнасувшыларына, солай болып 50-нши республика бойынша слетында катнаскан ТОКС катнасувшылары Айгуль Аджалавовага, Джаминат Аджигишиевага, Камила Акбузовага, Ратмира Ачакановага, Рамазан Козбаковага Сый грамоталарын тапшырды. Солай болып ол уьйкен патриотлык аьрекети уьшин мектебтинъ ТОКС етекшисине разылыгын билдирди.
Суьвретте: шарадан коьринис.
