Бу кишкей кызалак, Терекли-Мектеб авылдынъ яс яшавшысы, тек янъы авыл мектебининъ 1-нши классын кутарып, 2-ншиге шыккан. Сондай бала акында да не айтпага болады дер биревлер. Коьресиз, айткандай зат бар эм аз да тувыл. Ол тек бир окув йылы ишинде оьз оьнери мен хыйлы уьстинликлерге етиспеге йол тапкан.
Роза Колебаева (кызалактынъ аты эм тукымы солай) – Кадрия атындагы орта мектебининиъ окувшысы, аьли де «Ногай Эл» балалар бавына юретаган заманыннан алып йырламага, ятлавларды яттан окымага суьетаган эди. Соьйтип, ол былтыр Кадрия Темирбулатовадынъ тувганлы 70 йыллыгына багысланган мектебтинъ шатлыклы линейкасында шаирдинъ ятлавын окувы ман йыйылганлардынъ эсин каратты. Роза авыл еринде оьткерилген янъыйыллык бал-маскарадта, Навруз-байрамында катнасты эм РДК етекшиси Солтанмурат Караяновтан Сый грамоталары ман савгаланды.
Болса да Розадынъ уьстинликлери быйылдынъ басланувы ман бирге оьрге йол алды демеге керек. Р.Колебаева, увыт айында Савдуныялык тувган тил куьнине багысланып оьткерилген «Аталардынъ тили» деген ятлавларды яттан окыйтаганлар конкурсында 1-нши орынды алып, енъуьвши болды. Ога тапшырылган Дипломнынъ кубогы да бар.
Быйыл коькек айында балалар художестволык яратувшылыгынынъ 11-нши республикалык фестивали болып озган. Р.Колебаева сонда да катнасып йырлаган эм яттан ятлав окыган.
Талаплы кызалак Сургут калада оьткерилген Савлайроссиялык тувган тилинде яттан ятлавлар окыйтаганлардынъ балалар конкурсында ортакшылык эткен эм 2-нши орынды алган. Розага Дипломды Сургуттагы ногай яс-явка союзынынъ ямагат организациясынынъ председатели Р.Алимурзаев тапшырган.
Роза аьли бала болса да, оьзининъ алдына бир етимистен баскасына етисермен деген мырат салатаган болса ярайды, ол янъыларда, курал айында, атасы Залимхан ман («Айланай» фольклор-этнографиялык ансамблининъ солисти) бирге «Дагестан аьели» деген аьел художестволык яратувшылыгынынъ 17-нши республикалык фестивалинде катнасты. Сонда Колебаевлердинъ аьели де ДР маданият министри З.Бутаевадынъ атыннан аьел художестволык аьдетлерин эм халк яратувшылыгын саклав уьшин айырым Диплом ман савгаланды. Министр З.Бутаевадынъ тагы бир Дипломы Роза Колебаевага «Кишкей тавлылар» деп аталган 11-нши республикалык балалар художестволык яратувшылык фестивалинде быйылдынъ Халклар ара балаларды коршалав куьнинде катнасканы уьшин тапшырылды. Сонда ол А.Ковалевтынъ «Ах, Дагестан» деген ятлавын яттан окыган. Бу дипломлар ман бирге балага баалы савгалар: суьврет, ваза, телефонды электроток пан толтыратаган (зарядка) алат та берилген.
Роза солай ок быйыл 12-нши тамбыз айында Россия куьнине багысланган концертте «Меним Россиям» деген йырды да занъыратып йырлаган.
Бала тувганнан алып аьелинде тири, бирерде тап уьйкенлердей ойлап алатаган кызалак болып оьседи. Ол балалар ман тар дослык тутпага суьеди. Кызалак ана тилинде бек аьруьв соьйлейди эм окыйды. Ол ногайша сарынлар да коьп биледи эм бирерде уьйинде болатаган аьел байрамларында соларды йырламага бек суьеди.
Р.Колебаева быйыл тек 7 ясына толган. Алдыда онынъ ийги келеектегиси бар деп сенемиз.
М.Юнусов.
Суьвретте: Р.Колебаева.
