Оьткен юма «Ногайский район» МР администрациясында Дагестан Республикасынынъ Сырт регионынынъ муниципаллык районларынынъ эм кала округларынынъ пресс-службалар ваькиллерининъ информационлык политикасын яшавга шыгарувдынъ хайырын арттырув соравлары бойынша семинар-кенъеси болып озган.
Бу шарады ДР Аькимбасынынъ Администрациясынынъ информационлык политикасы бойынша управлениеси уйгынлаган эди. Сонынъ куллыгында Кизляр, Хасавюрт, Бабаюрт, Тарумов, Казбек, Ногай районларынынъ эм Хасавюрт, Кизляр эм Южно-Сухокумск калалардынъ аькимбасларынынъ орынбасарлары, пресс-служба етекшилери, солай ок республикалык коьлем информация ваькиллери катнастылар.
Йыйылганларга каратылган саламлав соьзи мен ДР Аькимбасынынъ Администрациясынынъ информационлык политикасы бойынша управление етекшиси Рашид Акавов соьйлеген. Ол аьлиги заманларда янъылыкларды язув эм аьзирлев аьрекети йогары дережелерге тийисли болмага эм коьп санлы окувшылар аудиториясын туьзбеге керегин белгиледи.
Рашид Забитовичтинъ билдируьви мен, тек колайсыз ялган информация муниципалитетлердинъ, соны ман бирге республикадынъ да сыйын кемитеди, солардынъ абырайына карсы каратылган информация болады. Ол йыйылганлардынъ эслерин ялган информация кеплерине каратувы ман бирге, солай ок сога карсылык этуьв технологияларын да атады.
Кенъесте солай ок власть органларынынъ информационлык ашыклыгын арттырув соравлары ман бирге миллет проектлерди яшавга шыгарувды информационлык ягыннан канагатлав пайдалыгын оьстируьв соравлары да ойласылды.
Кенъестинъ барысында ДР Аькимбасынынъ Администрациясынынъ муниципалитетлер эм власть органлар пресс-службалары ман биргелесип аьрекет этуьв бойынша етекшиси Аида Изеева республикадагы оьзгерислер акында янъылыкларды таралтув йорыклары эм информационлык политикасы бойынша управлениеси мен биргелесип аьрекет этуьв акында хабарлады, муниципалитетлердеги пресс-службаларды информацияды оьз ерлеринде таралтувга бас куьш- лерин салмага шакырды.
Новолак районынынъ администрациясынынъ IT боьлигининъ бас специалисти Марияна Шавлукова «Яндекс. Новости» агрегаторында контентти таралтувдынъ пайдалыгын арттырув бойынша оьз ис сулыбы ман боьлисти.
Кизляр каладынъ администрациясынынъ пресс-службасынынъ етекшиси Сельминаз Салихова муниципалитетлер имиджин туьзуьв кереги акында айтты.
– Муниципалитетлердеги пресс-службалар бириншилерден болып ерли маьселелерди коьтермеге эм власть яшавшылардынъ маьселеси акында билетаганы акында айтпага тарык. Ол зат сол ерде ок та туьрли соьзлерди эм ялган хабарларды куьн йосыгыннан тайдырады, – деп белгиледи Сельминаз Салихова.
Туьзилетаган информационлык контентининъ пайдалыгын арттыратаган алатлар акында «Координационлык информационлык-маданият орталыгы» ДР ГБУ басшысы Мухтар Амиров хабарлады.
Кенъести тамамлай келип, ДР Аькимбасынынъ Администрациясынынъ информационлык политикасы бойынша управлениесининъ етекшиси Рашид Акавов оьзининъ тармак изданиелеринде муниципалитетлердеги пресс-службалардынъ куллыкларынынъ хайыры артканын эм солардан «Яндекс.Новости» агрегаторында информацияларынынъ тез арада шыгып баслаганын куьтетаганын билдирди.
– Биз сизге оьз ис аьрекетинъизди онъламага, белсенли этпеге заман беремиз. Эгер сиз буьгуьнги айтылган кенъеслерди кулланмаяк болсанъыз, биз тийисли амаллар коьрмеге керек боламыз. Биз республикамыздынъ информационлык политикасын бузбага болмаймыз. Соравларынъыз, маьселелеринъиз бар болса бизге билдиринъиз, ярдам этермиз, – деди Рашид Акавов.
