Россияда эт эм баска тамак-азык продуктлар баалары оьскен. Экспертлердинъ айтувы ман, бу маьселе тек Евросоюз эллери эм США салган санкциялар ман байланыслы тувыл. Уьйкен себеплигин тийгистеди валюта рыногындагы аьл де. Аьли бас деп керекли товарлар баалары оьскен, эм соны ман туьзилген авыр аьл, белки, аьли де орын табаяк болар.

Бек каты соьйледи бу оьткир маьселе мен байланыста РФ Государстволык Думасынынъ спикери Вячеслав Володин. Ол саьвдегерлерди, мадарлы савда аьрекети мен каьрлевши предпринимательлерди халктынъ шегип турган авыр заманында байымаска шакырды.
«Биз баьримиз де анълаймыз: бизим элимизде бу авыр, тыйдажылык аьллер орын тапкан заман вакытында кайбир товарлар баалары оьспеге болады. Мысалы, валюта курсын оьстируьв аркасында яде баска эллерден товарлар еткеруьвде тувган авырлыклар ман байланыста. Ама Россияда болдырылатаган эм мундагы халк пайдаланатаган продукция акында соьз бардырылып, санкцияларга негизленип, олардынъ баалары кайбиревлердинъ эрки мен оьстирилмеге ярамайды», – деди политик.
В.Володин белгилегенлей, Россиядынъ товарлар болдырувшыларында кериге салынган бас деп керекли товарлар бар, бу яктан танъкылык йок, сонынъ уьшин ондай аьлде товарлардынъ бааларынынъ оьсуьви негизленмеген. Володиннинъ билдируьви мен, оьткен юма ишинде бу сорав Федераллык Антимонопольный службасынынъ (ФАС) катнасувы ман РФ Госдумасынынъ пленарлык кенъесинде ортага салынып ойласылган. Муннан алдын ФАС товарлар болдырувшы уьйкен предприятиелер мен товарлар бааларын карарлавда тыйдажылык токтасувга келмеге макулласкан.