Астрахань каласында, областьте халк маданиятынынъ илми-методикалык орталыгы бойынша «Дослык уьйи» деген боьлигинде, «Шоьл йыры» («Степная песня») деп аталган Тахира Джальмуханбетовадынъ ятлавлар йыйынтыгынынъ презентациясы уйгынланып оьтти. Онынъ биринши китаби «Медиаграф» баспасында дуныя ярыгын коьрди. Презентациядынъ барысында Тахира Хамит кызы оьзининъ, кайтип ятлавлар язып баслаганы акында, китаптинъ туьзилуьв тарихи бойынша хабарлады. Йыйылганларды янъы йыйынтыгыннан ятлавлары ман таныстырды.
Шаир мен озгарылган йолыгыска онынъ дослары, ис йолдаслары, ногай ямагатынынъ ваькиллери, окув ошагыннан студентлер йыйылган эдилер.
Авторды хош алып Астрахань областининъ халк маданиятынынъ илми-методикалык орталыгынынъ етекшисининъ орынбасары Алена Кулик шаир Тахира Хамит кызынынъ ярык оьнери барын, онынъ ятлавлары патриотизм сезими мен, тувган ерине уьйкен суьюв мен толганы акында белгиледи. Тахира Хамитовнады китабининъ дуныя ярыгына шыгувы ман Растопуловка авылынынъ аькимбасы Мансур Сапаров, ногай шаири эм язувшысы, Россия Язувшылар эм Журналистлер союзынынъ агзасы, «Шоьл йыры» деген йыйынтыктынъ редакторы Асан Найманов, АРОО «Эдиге» деген Ногай маданият орталыгынынъ» президенти Эльдар Идрисов, Россиядынъ архитекторлар союзынынъ агзасы, Астрахань областинде белгили архитектор-реставратор, Абдрахман Махмудов эм сондай баскалар кутладылар.
Шаирдинъ янъы шыккан йыйынтыгына кирген ятлавларын Дженнет Джумаева, Альбина Кадырбердиева, Рамиль Атманбетов, Рустам Игалиев эм сондай баскалар окып эситтирдилер. Сахнада шаирге багыслап «Дослык» деген фольклор-этнографиялык ансамблининъ катнасувы ман Эльвира Хасановадынъ йырлавында белгили ногай йырлары йырландылар. Шарага йыйылганларга ногай биювлерин «Тулпар» деген халк биюв ансамбли эм хореографиялык дуэти Альбина Кадырбердиева эм Альбина Суюнова оьнерли бийип коьрсеттилер.
Шарадынъ сонъында автор йолыгыска келгенлердинъ савлайына да эм, солай болып, Астрахань областиндеги халк маданиятынынъ илми-методикалык орталыгы бойынша «Дослык уьйи» деген боьлиги шарады йогары оьлшемде уйгынлаганы эм йылы йолыкканы уьшин белгилеп, уьйкен разылыгын билдирди.
Расул Шугаипов.
Суьвретте: шара катнасувшылары.
