Кайтип айтсак та, Билимлер куьни – айырым аьлемет байрам. Эм сол куьн оьткерилетаган шараларды да мектебке келисли этип озгармага болады. Айтпага, баьри окув сабаклары бойынша окувшыларды кызыксындырган дерислер. Соны ман окувшылардынъ былтыр алган билимлери яз куьнлеринде мутылган ма яде эслеринде бир зат сама сакланган ма экенин тергемеге болады. Эгер класста янъы келген окувшылар бар болса (ондай аьл болады бир окув басамактан баскасына коьшкенде), окувшыларды куьп-куьплерге боьлип, ойын озгармага болады, соны ман мектебке янъы келген окувшыларга, коллектив сырасына кирисип, янъы класс пан тез таныспага эп туьзиледи. Айтпага, мектебте окув аьрекети мен байланыслы темага «Ак шешекей» деген ойыны.

Баслангыш касслардан келген балаларга пайдалы болар «Билимлер Эли мен кезинуьв» деген ойыны. Онынъ барысында окувшылар класс боьлмелерининъ орынласувы ман танысарлар, оларда кайдай окув сабаклары бойынша дерислер озгарылатаганын билерлер, енъил тувыл соравларга явапларлар. Соны ман биргесине янъы окытувшылар ман да танысарлар.
Уьйкен класслардынъ окувшылары уьшин сол куьн « Фантастика проектлерин коршалав» яде «Келеектеги акында ойланып» деп, кешликлер уйгынламага болады. Ондай кешликлер янга якын эм пайдалы затларды бирлестирмеге эп тувдырады: янга-якын деген – ол биюв, а пайдалы деген – окув сабаклары бойынша билимлерин коьрсетуьв. Белки, соьйтип туьрли окув сабаклар бойынша кешликлер уйгынлап оьткеруьв басланар, эм мектеб окувшыларга тек билим алув тувыл, бир-бириси мен аьллесуьв, бос заманын озгарув орталыгы болар. Босына айтпаган ша акыллы аьдемлердинъ бириси «Энъ уьйкен байлык – ол аьдем-аьдем мен аьллесуьв», – деп.
Бу шарады мектеб меканында, солай ок орманлык ерде яде парк ишинде озгармага болады, куьз – табиат байлыкларын йыюв заманы экенин эсапка алып эм «Арбузник» деген ойынын уйгынламага тувган эп пен пайдаланып.
«Арбузник» деген не зат? Йогарыда айтылганлардынъ бириси эм карбыз (оны ман ойынлар, конкурслар, йырлар эм биювлер арасындагы танапысларда тамакланмага болады).
А, белки, мектебте окув йылын спорт ислери мен баслайтаган аьдет бардыр. Мысалы, окытувшылар эм окувшылар (яде аталар эм балалар ара) футбол ойыны.
Коьресиз, Билимлер куьнинде баьрисин де бирлестирмеге болады: куьшлиди эм йигерлиди, юйрик эм онълы балаларды, билимлилерди эм баьрин де билмеге суьетаганларды, солай ок бу касиет-кылык белгилерин оьзинде оьрлендиреек кишкей яслыларды. Баьрине де ойын да, ис те табылаяк.
Билимлер куьни – баьри несиллер аьдемлерининъ янына якын байрам. Темир устасы эм космонавт, эмлевши эм сыйыр савувшы, курувшы эм аьскерши, академик эм геолог – баьриси де уьйкен яшав йолына мектебтен шыкканлар.
Мектеб балалар алдында яшав сыхырларын (оларды шешуьв уьстинде коьп акыллы аьдемлер оьмирлер бойы бас авыртканлар) ашады. Мектебте окув йылларында балалар белсенли яшап, ойлап, излестирип уьйренедилер. Олар алдында турган борыш – савлай аьдемшилик пен йыйылган билимлерди байырлав.
Барма дуныяда 1-нши Сентябрь куьнинде миллионлаган аьдемлерди билимлер алувга шакыратаган , сеси мен ян коьнъилликти коьтеретаган мектеб занъындай занъ?!