Дагестан Республикасы бойынша коронавируслы маразга карсы вакцинация этилуьв кампаниясы бардырылады. Бу куьнлерге республикамыз бойынша бес мынънан артык аьдем вакцинады алдылар.
«Шоьл тавысы» республикалык газетасынынъ бас редакторы Эльмира Кожаева да вакцинады алмага аьзирлик коьреди, аьли уьшин ол анализлер берген.

– Оьткен йылдынъ май-июнь айларында бизим куллыкшылардынъ коьбиси сол зарарлы мараз бан авырыдылар. Сол заманларда газетамыздынъ баспаланувы да токталды. Аьли сол маразга карсы вакцина шыгарылды, неге биз соны алып, оьзимиздинъ савлыгымызды саклап болмаймыз. Аьли бизим газетамыздынъ журналистлери тийисли анализлерди берип, вакцинацияга аьзирленедилер. Биз – журналистлер, коьп ерлерде аьрекет бойынша боламыз, сога коьре вакцинация бизим оьзимизге пайдалы, сол бизди яман мараздан саклаяк, – дейди бас редактор.
Ногай районымыз бойынша вакцинация юритиледи. Ногай ЦРБ бас врачы Фаризат Межитова билдиргенлей, уьстимиздеги йылдынъ 17-нши куьнине Ногай районы бойынша 65 аьдем вакцина алганлар, аьли де аьзирлик коьретаганлар саны заьлим.
Буьгуьнлерде Ногай орталык больницасынынъ инфекция боьлигинде эки коронавируслы мараз бан авырыйтаганлар бар, бес аьдем уьйлеринде эмлев аладылар деп те эсапка алынган.