Ногай халкымыздынъ зейинли суьвретшилерининъ санын кол ман санамага болады. Олардынъ аьр кайсысынынъ суьвретлеринде – ногай халкынынъ бай тарихи, шет-кырыйсыз, тоьсинде ярасык шешекейлер мен Ногай шоьлдинъ ярасыклыгы, онда оьмир бойы яшаган эм буьгуьнлерде яшав суьрген патриот аьдемлери, йигит баьтирлери эм сондай коьп баска затлар.
Сондай оьнерли суьвретшилеримиздинъ бириси – Осман Индрали увылы Суюндиков.
Осман Индрали увылы асылы ман – Ногай районынынъ Терекли-Мектеб авылыннан. Индрали эм Исудинъ аьелинде тунгышы Осман, оннан сонъ Солтан эм сылув кызы Мадина тербияланып асыл болдылар. Мектебти тамамлаган сонъ, 1980-нши йыл Махачкалада М.Джемал атындагы художестволык училищединъ педагогикалык боьлигине туьсип, оны етимисли тамамлаган. Соннан бери ол оьз оьнерлигине саьбийлерди уьйретип келеди. Онынъ окытувшыларынынъ бириси белгили суьвретшилер С.Батыров, М. Манкаевтинъ колында суьвретти ясавдынъ сыхырлыгына уьйренген. 2010-ншы йылдынъ коькек айынынъ 4-нши куьнинде йыл сайын суьвретши О.Суюндиков окытувшысы оьз талабын аямай берген С.Батыровтынъ эстелигине выставкага оьзининъ суьвретлерин салады. Солай болып, онынъ суьвретлери Махачкалада, Астраханьде, Шешен Республикасынынъ Сарысу авылында, оьзининъ тувган Ногай районында оьткен выставкаларда салынган живопись, натюрморт суьювшилерди таныстырган.
Янъыларда ногай суьвретшисине «Каньон» деген Биринши халклар ара симпозиумында бир юма узагында катнаспага бакты буйырды. Онда элимиздинъ туьрли калаларыннан, айтпага, Санкт-Петербург, Владикавказ, Волгоград, Екатеринбург, Элиста калаларыннан туьрли суьвретшилери ортакшылык эттилер. Йыйылган суьвретшилери Чиркей водохранилищеде, Гуниб эм Шамильский районларында болып, оьз оьнерлерин коьрсеттилер. Осман Индрали увылы «Гунибтинъ шети», «Аьвелги Гоор авылы» деген туьрли туьсли ярасык суьвретлерин уьйкен оьнершилик пен ясады. Эндиги сол арт-симпозиумда суьвретшилер мен ясалган 30 ислери Махачкалада, оннан сонъ Москвада выставкаларда катнасаяклар. Буьгуьнлерде оьнерли суьвретши 200 куллыклардынъ авторы болады. Айтпага, «Оьтпек», «Бесиктинъ касында», «Саклав», «Шоьлде согыстынъ янъыравыгы» деген эм сондай баска суьвретлери суьврет суювшилердинъ коьнъилин коьтерип, ярасык дуныясы ман куьезлендиреди.
Осман Суюндиков 37 йыллар бойы Джанибеков атындагы эм Кадрия атындагы мектеблериндеги куллык этип келеди. Ол суьйген исине, савлай янын салып ясаган суьвретлерине салып, келмей, аьелинде суьйикли аьел басы да болады. Ол Шарбийке ян косагы ман увыллары Азамат, Расиль эм Айсылув кызын тербиялап, тувра яшав йолына салганлар. Келеекте де ногай суьвретшиге яратувшылык ойлары яшавга шыгарылып, бизди аьли де коьп суьвретлери мен суьйиндирип келгенин йорайман.
Г.Нурдинова.
Суьвретте: Осман Суюндиков.
