Россия Федерациясынынъ коьплеген мектеблери, сол санда бизим Ногай районынынъ Терекли-Мектеб авылынынъ А-Х.Джанибеков атындагы орта мектеби де оьзининъ выпускниклерин уьйкен йолга салды. Бу оьзгериске багысланган шара айтылган мектебте оьткен юма сонъгы куьн болып озды.

Сонъгы занъга багыслаган шара мектеб каралдысына йыйылганлар алдына 9-ншы эм 11-нши классларынынъ окувшылары ман класс етекшилери байрамша шыгувы ман басланды.
Шара юритуьвшилер келген «Ногайский район» МР администрациясынынъ аькимбасы Мухтарбий Аджековка, мектеб етекшиси Курасхан Ярикбаевага выпускниклерди кутламага мырсат бердилер. Уьйкен яшав йолга шыгып бараятырганларга биринши класс битиреятырган окувшылар оьз соьзлерин айттылар.
Шарадынъ барысында выпускниклерге де сонъгы соьзди айтпага ыхтыяр бердилер. Бу куьн олар оьзлерининъ йырлап эм бийип болув оьнерлерин де коьрсеттилер.
Мектеб етекшисининъ орынбасары Эльмира Танъгатар кызы Суюндикова болса, выпускниклердинъ окув йылы ишинде етискен етимислери акында айтып, грамоталар тапшырды. Олардынъ спорт яктан уьстинликлери акында Адильхан Бегали увылы Койбаков, Арслан Амирхан увылы Бакиев айтып кеттилер. Оьз окытувшыларына, тенълерине каратылган соьзди ийги окувшылардынъ бириси Асанбий Батыров айтты.
Шарадынъ ызында Россия Федерациясынынъ эм Дагестан Республикасынынъ байрагын туьсируьвге ыхтыярды 11-нши «а» класс окувшылары Кимран Аметовка, Эмилия Кадыловага, София Тангаевага эм 11 «б» класс окувшылары Амина Суюнбаевага, Руслан Уразакаевке, Айнара Арикбаевага берилди.
Артта 11 йыл окув йылын шайытлаган, мектеб яшавынынъ тамамын келтирген – сонъгы занъ согылды. Сол маьнели борышты выпускниклер Милана Курганова ман Айсель Кокурова эм биринши класс окувшысы Сумая Оракова толтырдылар. Эндиги алдыда кенъ яшав. Сол йолда биз аьр бир выпускникке тек уьстинликлерди эм етимислерди йораймыз. Аьли уьшин Ортак патшалык сынавларынъыз енъиллик пен оьтсин деген йоравды этемиз.
Г.Сагиндикова.
Суьвретте: сонъгы занъ согылады.