Ызгы йыллар ишинде Ногай районымызда ийги як туьрленислер аз болмадылар. Туьрли федеральлик, региональлик проектлер бойынша янъы курылыслар, йоллар эм сондай баска затлар янъыртылдылар. Билимлендируьв учреждениелерине айырым эс этилинеди.

Билим ягыннан да сапатлары осал тувыл. Бизим районымыздынъ окувшылары Ортак патшалык сынавларды да республика бойынша осал оьтпейдилер эм Россия бойынша йогары окув ошакларына уьстинликли туьседилер. Оьктемсиймиз оьз выпускниклеримиздинъ етимислери мен, а олардынъ сондай аьлге етуьвинде окытувшыларымыздынъ да уьйкен уьлислери бар.
Окувшылардынъ эм окытувшылардынъ оьтип баратаган йыл ишинде етискен уьстинликлери акында Кадрия атындагы орта мектебининъ етекшиси Альфия Амирхан кызы Акимова ман хабарласувымызды озгармага токтастык.
Альфия Амирхан кызы Акимова (кыз тукымы Аджиева) Терекли-Мектебтинъ А-Х.Джанибеков атындагы мектебин 1996-ншы йыл уьстинликли окып битиргеннен сонъ, республикамыздынъ бас каласы Махачкаладагы йогары педагогикалык окув ошагына туьседи.
– Мен окытувшы кесписин сайлаганыма Нелли Степановна Баймурзаева оьз уьлисин коскан. Оьз бактым бойынша бек билимли окытувшылар Кизлярхан Бийсултановна Кулунчакова, Гульсагира Абдулкадыровна Сахтаева, Сталинат Казмухамбетовна Заргишиева, Кезибан Анваровна Батырова эм Фатима Янмурзаевна Ярлыкапова ман расканыма бек разыман. Бу уьйкен аьриптен аьдемлер меним окытувшы болып кепленуьвиме себеплигин эткенлер. Уьйкен разылыгымды, 1998-нши йыл, мага Дагестан Республикасынынъ педагогикалык йогары окув ошагынынъ студентине 1-нши класстынъ окувшыларын сенген, сол йылларда Кадрия атындагы мектебин етекшилеген Мадина Муса кызы Абдулалимовага билдиремен, – дейди Альфия Амирхан кызы Акимова.
– Альфия Амирхан кызы, мен газета окувшыларымызды сондай ийги етекши мен таныстырганнан сонъ, ийги етекши деп айтувым да босына тувыл, сизинъ куллыгынъыз акында тамамлар оьзлери айтадылар. Сизинъ окувшыларынъыз район, республика ерлеринде озгарылатаган шараларда савгалы орынларды аладылар. Уьстинликлерге етисуьвинъиздинъ сырлары бар ма?
– Савболынъыз, меним ис аьрекетиме йогары баа бергенинъиз уьшин. Шалысаман. Мага сенилген сол дережели ис аьрекетти мен ийги аьлде бардырмага борышлыман. Мен дайым оьзим етекшилейтаган ис коллектив алдында: «Биз билимли балаларды колтыкламага керекпиз», – деп айтып тураман. Оннан сонъ туьрли шараларда катнаспага ниетленген окытувшылардан да тек енъуьвди талаплайман. Оьз куллыгымда бек суьйип ислеймен, солдыртагы меним исимнинъ етимислери эм сырлары.
– Мине тагы да бир йылды тарихке йибермеге турымыз. Аьр бир аьдем йылдынъ сонъында оьзи бир ойланып, йыл ишинде эткен ислери, келеекке салатаган планлары акында ойланады. Сиз оьтип баратаган йылды кайтип озгардык деп ойланасыз?
– Оьтип баратаган йылымыз яман тувыл, мектебимизде де коьп янъылыклар болды, биз республикалык «100 мектеблер» проектине кирдик, соннан келген карыжга мектебимизде янъыртылув ислер оьткерилдилер, азбар салынды. Окытувшымыз Айшат Куруевна Даирова – район, сонъ зональный кезегинде «Йыл окытувшысы» шарасында катнасып, енъуьвши болды, республика кезегинде де ийги 10 окытувшыдынъ ишине кирди. Орыс тил эм адабиат сабагыннан окытувшы Райхан Умар кызы Абдулгапова 8-нши «б» класс окувшысы Фаина Алиева ман Савлайроссиялык сочинениелер шарасында катнасып, республика кезегинде савгалы биринши орынды алды.

Бизим окувшыларымыз Савлайроссиялык олимпиадаларда да оьзлерининъ терен билимлерин коьрсетедилер. Оьткен окув йылында Рукият-Ханум Акимова республикалык кезегинде савгалы орынды да алган эди. Аьли уьшин бизим окувшылар Савлайроссиялык олимпиадаларда катнасып, районымыз бойынша алды орында боладылар.
Оьтип баратаган йылдынъ ишинде бизде Дагестан Республикасынынъ Аькимбасы Сергей Меликов, Билимлендируьв министри Яхья Бучаев конакта болып кетти.
– Альфия Амирхан кызы, Янъы йылга кайдай уьмитлер мен абытлайсыз?
– Оьзек те, ойларымыз да, сенимлеримиз де ак. Янъы мектебке кирмеге ниетимиз бар. Власть органларымыздынъ берген, айтатаган соьзлерине бек ынанамыз. Янъы мектебке кирсек, соны мектеб-гимназия этпеге ниетимиз бар, солай болса, бизде мырсатлар да коьп болар эди. Оьз ойыма коьре, сонда профильли окув этер эдик, биология эм химия сабакларына айырым эс болар эди, неге десе аьли уьшин ис рыногында медициналык куллыкшылары кереги коьринеди, окувшылардынъ коьбисининъ кеспи сайлавлары да сонда токтайды. Аьли уьшин бу меним ойларым, армаганда не болаягын яшав коьрсетер. Келеек йылга ийги уьмитлер мен абытлаймыз, баьри тоьгерегимдегилерге тек ден савлыкты, бу куьнлерде бизге кереги сол, узак наьсипли оьмирди йорайман, баьри ийгиликлер де балаларга болсын.
– Альфия Амирхан кызы, савболынъыз мага айырган заманынъызга, дурыс айтасыз, баьри зат та бу куьнлерде ден савлыкты йоравга аькеледи, келеек йыл бизге тек ийгиликлер аькелсин. Сизинъ етекшилеген ис коллективинъизге тек йогары уьстинликлерди йорайман.
Янъы йылынъыз хайырлы аяк пан кирсин.
Г.Сагиндикова
хабарласувды юриткен.
РФ Журналистлер союзынынъ агзасы.
Суьвретлерде: А.Акимова; Кадрия атындагы мектебининъ ис коллективи.