Янъы окув йылын балалар юреклери телезип карайдылар. Олар оьзлерининъ янъы кийимлерине, окув алатларына куванадылар. Оькинишке, аьр бир аьелдеги балалар туьрли аьллерде боладылар. Сога коьре кенъ юрекли аьдемлер саьбийлерге куваныш савкатламага шалысып, ак ниетли ислер этедилер.

Ногай районында янъы окув йылы алдында керексинетаган аьеллердеги балаларга савкатлар тапшырув ийги аьдетке кирди. Йыл сайын соьйтип балалардынъ коьнъиллерин коьтерер, олардынъ ата-анасына ярдам этер ниетте халк коьмеги мен балаларга мектебке керекли алатлар йыйналады. Сол эл мен йыйналган савкатлар ишинде тептерлер, калемлер, туьрли туьсли бояклар, портфельлер эм коьп баска затлар болады.
Билим куьниннен алдын Ногай районында «Балады мектебке аьзирле» деген акция оьтти. Бу куьн балаларга 30 савкат – портфельлер эм балага мектебке керекли баска алатлар берилди. Савкатларды керексинетаган коьп балалы аьеллердеги окувшылар алдылар. Бу акция Дагестан Хатынлар союзынынъ председатели Интизар Мамутаевадынъ эм ДР авыл хозяйстволык министри Мухтарбий Аджековтынъ коьтергишлеви мен озды. Саьбийлерге савкатларды «Яслык» яслар боьлигининъ етекшиси Абибулла Шамбилов, район Хатын-кызлар советининъ председатели Асият Манкаева, мектеблер етекшилери эм баскалар тапшырдылар. Балаларга янъы окув йылы алдында ден савлык, окувда уьстинлилер, дайым таза аспанды йорадылар. Балалардынъ ата-аналары оларды коьтергишлегенлери уьшин уьйкен савбол айттылар.
Н.Кожаева.
Суьвретте: балаларга савкатлар тапшырув мезгили.