Бар сондай аьдемлер, олар ман соьйлемеге де, катыспага да ийги болады. Сондай аьдемлер сени аьр заманда да коьтергишлейдилер, олар ман соьйлегенде, янынъа да йылувлык энеди. Сондай инсанлар оьз бактыларын аьдемлердинъ ден савлыгын саклавга багысласа, сол да – уьйкен наьсип.
Гульсагидат Расул кызы Култаева Буденновск каласында кала поликлиникасында участковый врач-терапевт болып ислейди. Онынъ пациентлери врач-кыскаяклыдынъ тек кеспи усталыгы ман тувыл, ийги соьзи мен де эмленетаганларын айтадылар. Туьрли аьдемлер келедилер терапевтке, олардынъ коьнъилин коьтеруьвди Гульсагидат Расул кызы исининъ бас борышы деп санайды, неге десе авырыйтаган аьдемнинъ бас деп коьнъилин тапсанъ, сонъында ол оьзи де эмленуьвге ымтылады.
Гульсагидат Классова (кыз тукымы) Ногай районынынъ Уьйсалган авылында тувып-оьскен. Мунда ерли мектебти уьстинликли битирип, Ставрополь каласында патшалык медициналык университетининъ «лечебный» факультетине туьседи. 2016-2017-нши йыл «терапия» бойынша мунда интернатурасында окыган.
Врачтынъ иси тынышлардан тувыл, куьндегилик яшавында олардынъ куллыгы – баьтирлик. Гульсагидат Расул кызы оьз исин суьйип аьрекетлейтаган врачлардынъ бириси болады. Поликлиникада эртенъги 8 саьаттен алып туьске дейим ислейди, авырувлыларды карайды, олардынъ авырувын аянлап, эмлев дарманларын язады. Туьстен сонъ врач уьй-уьйден юреди, эсли аьдемлерге барып, олардынъ ден савлыгын тергейди.
– Кеспимди юрегим мен сайлаганман, кыйынлы болмаган бир куллык та йок болса ярайды, куьн узагында арыймыз, болса да сав куьн ишинде бир неше аьдемнинъ авырувларын енъил эттим деген ой мага танълагысы куьнге куьш береди, юрегиме эм болады. Юмада бир эки кере автокоьлик пен кала бойынша авырувлыларды айланамыз. Кала майданына шыгып, яшавшыларга вакцинация этетаган куьнлеримиз болады, – деп хабарлайды мени мен Гульсагидат Култаева.
Оьз исин суьйген врач билимин арттырмага шалысады. Соьйтип, Гульсагидат Расул кызы сондай ниет пен Москва, Ставрополь калаларында кеспи усталыгын оьстируьв курсларында окыйды. «Гериатрия», «Нефрология», «Коронавируслы инфекцияды аянлав, алдын шалув эм эмлев» бойынша оьз билимин арттырады врач. Гульсагидат Расул кызы поликлиникада ийги врачлардынъ бириси деп саналады. Озган йыл баьримизге де кыйынлы эди. Гульсагидатка да сол заман кыйынлы болса да, врач-кыскаяклы оьз сулыбын оьстирди, кайдай кыйынлы авырувлылар ман ислемеге туьсти. Аьр бир кыскаяклыга ян йолдасы тирев болады. Гульсагидат Куьнбатар авылынынъ ясы Азамат Култаев пен аьел курып, эки аьвлетлерин тербиялайдылар. Азамат Буденновск каласында аьскерлер боьлигинде куллык этеди.
Савлай элимиздинъ врачлары кеспи байрамын карсы аладылар. Мен де Гульсагидатка исинде уьстинликлер, яшавында наьсип йорайман.
Г.Бекмуратова.
Суьвретте: Г.Култаева.
