Терекли-Мектеб авылында ярастырув ислериннен сонъ, имам Абу-Ханифа атындагы медресе кайтадан ашылды.
Бу шатлыклы шарада Дагестан Республикасынынъ Авыл хозяйство эм тамак-азык министри Мухтарбий Аджеков, Ногай район аькимбасы Джамалутдин Эсиргепов, Дагестан Муфтийининъ коьмекшиси Магомед Магомедов, Ногай район имамлар советининъ председатели Али Арсланов, ислам илмилер докторы Абдул-Хаджи Аксаев, республикадынъ дин биригуьвлерининъ ваькиллери, айырым кала эм авыл имамлары, дин билимлендируьв ошакларынынъ окувшылары катнастылар.
Сол куьн медресединъ азбарында спорт ярыслары оьткерилди, балалар эм уьйкенлер уьшин тамакланув уйгынланды.
Медресединъ ашылувына багысланган байрам шарасы аксам намазынынъ алдында басланды. Ал деп сыйлы Кураннан белгили аятлардынъ бирисин Бабаюрт авылыннан дин аьрекетшиси Мухаммад Саидов окып эситтирди.
Район эм авыл ямагатына каратылган кутлав соьзи мен ДР Авыл хозяйство эм тамак-азык министри Мухтарбий Аджеков шыгып соьйледи. Ол бу ийги куьн уьйкен саваплык куллыгы: район медресесининъ ярастырув ислерининъ толы кутылувы эм медресе оьз окувшыларына капыларын кенъ ашувы ман байланыслы экенин айырым белгиледи. Онынъ айтувы ман, ызгы йылларда район еринде сондай ярастырув ислери ортакбилимлендируьв, маданият учреждениелеринде, балалар бавларында, автомобиль йолларында юритиледилер, янъы мектеблер, стадионлар курыладылар.
Министр бир неше айлар узагында алыстагы Чиркейден район орталыгына келип, кыска заман ишинде медреседеги ярастырув ислерин кутарув уьшин уьйкен куьш салган курувшыларга разылыгын билдирди. Мухтарбий Аджеков солай ок район дин аьрекетшилерин медресединъ ашылувы ман кутлады эм сонынъ босагасыннан келеекте керти ислам динимиздинъ ийги аьдемшилик аьдетлерин таралтаяк йогары билимли аьлимлер, дин аьрекетшилери шыгарлар деген сенимин де билдирди.
Дагестан Муфтийининъ коьмекшиси Магомед Магомедов Ногай районынынъ дин ямагатына республика Муфтийининъ саламын еткерди. Оьзининъ соьзинде ол ДР Муфтияты оьсип келеяткан несиллерде эдаплыкты тербиялавга уьйкен маьне беруьвин билдирди. Оьз ислеримизде эм соьзлеримизде бизим уллы Мухаммад пайхамбарымызга (Алла оны разыласын эм саламласын) усамага шалысувымыз бан биз яхшылыктынъ, акыйкатлыктынъ йогары идеалларын яклаймыз. Соьйтип биз динге сенетаган аьдем кайдай болмага керегин коьрсетемиз. Уллы имам Абу-Ханифа атындагы медреседе Ногай районынынъ ийги деген балалары тербияланувына Алла-Таалла оьзи йол ашсын!, – деген йоравын айтты Магомед Магомедов.
Ногай район аькимбасы Джамалутдин Эсиргепов Чиркейден келип медреседе куллык эткен курувшыларга, солай ок ярастырув ислерин материаллык ягыннан колтыклаган район орталыгынынъ яшавшыларына разылыгын билдирди.
Бу уьйкен саваплы куллык келеекте бизге эндиги янъыртылган имам Абу-Ханифа атындагы медреседе окыяк бизим балалардынъ яхшы саваплы ислери эм ийги берк билимлери мен кери кайтар, – деген сенимин билдирди район етекшиси.
Шарада ортакшылык эткен патшалык авар драма театрынынъ актеры, солай ок Дагестан ислам университетининъ студенти Магомед Дудуев Дагестан Халк поэти, Ленин эм СССР Патшалык баргыларынынъ лауреаты Расул Гамзатовтынъ «Дагестан акында» деген ятлавын окыды.
Ислам илмилерининъ докторы Абдул-Хаджи Аксаев исламнынъ аьдетлерин тутувда билимнинъ бек уьйкен орыны барлыгын белгиледи. Онынъ айтувы ман, билимсиз ызгы йылларда бизим дагестан аьеллеримизде де коьп баьлели ислер болып оьткенлер, неге десе дин аьдетлерин билимсиз юритуьвди Алла-Таалла кабыл этпейди.
Аьр аьдемге де, боьтен де бусырманга билим деген таза ава кимик керекли, – деди доктор.
Муннан сонъ шара кешки аксам намазын кылув уьшин токтатылды. Намаздан сонъ шара армаган юритилди эм сонынъ барысында хыйлы дин аьрекетшилери шыгып соьйлегенлер, дин нашидлери, Кураннан аятлар, дувалар окылган.
М.Юнусов.
Суьвретлерде: шарадан коьринис.
