Увыт айынынъ ызында Дагестан Аькимбасынынъ кесек заманга куллыгын юритуьвши Сергей Меликов Кумторкала районында болган эм мундагы «Янъы ой-ниеттинъ эм технологиялардынъ данъылы» деп аталган индустриаллык паркынынъ аьрекети мен таныскан.
Бу ерде Сергей Меликов индуст- риаллык паркларды эм Дагестаннынъ социал-экономикалык оьрленуьв ерлерин оьрлентуьв соравлары бойынша кенъес оьткерген.
Кенъесте республикадынъ уьйкен промышленность предприятиелерининъ етекшилери эм индустриаллык паркларынынъ компанияларынынъ управляющийлери, солай ок Ногай район администрациясынынъ аькимбасы Мухтарбий Аджеков катнаскан.
Кенъестинъ барысында региондагы индустриаллык паркларынынъ аьрекети акында Дагестан промышленность эм савда министри Низам Халилов хабарлады. Онынъ айтувы ман, республикада 7 индустриаллык парклары туьзилгенлер, солардынъ ишинде 4-ви – патшалык парклары. Солардынъ арасында – «Ногайпром» индустриаллык паркы.
Кенъесте боьтен де «Аврора» эм «Ногайпром» индустриаллык парк- лары ман байланыслы соравларды ойласувга уьйкен маьне берилди.
Ногай район администрациясынынъ аькимбасы Мухтарбий Аджеков «Ногайпром» индустриаллык паркы акында хабарлады. Ол парк еринде аьли мал союв эм этти промышленность негизинде асыллав бойынша предприятиелер аьрекетин бардыратаганы акында белгиледи.
«Мал союв эм этти асыллав проект куватлыгы суткада 1000 малды соймага эм промышленность негизинде асылламага амал береди. Солай ок мунда мал терилерин алатаган эм соларды баслапкы аьлде асыллайтаган эм эт консерваларын аьзирлейтаган цехлер де куллык этеди. 2018-нши йылдан алып предприятиелер продукциясын шет эллерге де йибередилер, соьйтип Иранга 1000 тонна кой эти йиберилген, элимиздинъ савда тармакларына эт консерваларын йиберип баслаганлар», – деп билдирди Ногай район администрациясынынъ аькимбасы.
Мухтарбий Аджеков инвестпроектлерди яшавга шыгарувдынъ бас маьселесин айтып белгилеген. Айтпага, Терекли-Мектеб авылдагы ПС подстанциясынынъ ис куваты 12,6 МВт, ама ызгы 15 йыллар узагында авыл яшавшылары ман электроярыкты кулланув оьлшеми артканнан себеп сога уьйкен куьш келеди.
Сергей Меликов аьр бир резидент оьзине айырым социаллык югин де алмага керегин, ога айырым онъайлыклар, сонынъ ишинде льготалы амаллар да берилетаганын белгиледи.
Кенъестинъ тамамында сонда коьтерилген баьри соравлар бо- йынша кенъейтилген йыйынды коькек айында оьткермеге деген карар алынды.
