Янъыларда бизге аьли де бир ийги хабар келди. Москва каласында
аьрекетлеген бизим ердесимиз Бриллиант Абдулмановна Межитова ис борышларын яваплы толтыратаганы уьшин Россия Федерациясынынъ коршалав министри, армия генералы Сергей Шойгудан Разылык алган. Ол Кисловодсктагы медицина колледжин уьстинликли окып тамамлаган. Бу куьнлерде РФ Коршалав министерствосынынъ 52-нши номерли Консультация – диагностикалык орталыгында (КДЦ) аьрекетлейди. Бу орталыкта армия генераллары, офицерлери, согыс аьрекетшилери медицина ярдамын аладылар. Олардынъ орталыктагы медицина куллыкшыларынынъ исине ийги белги беруьви эм сонынъ акында етекшилерине еткеруьв аркалы савгалар тапшырылады. Соьйтип Бриллиант Межитовадынъ аты ислеген еринде энъ де ийгилердинъ сырасында болды. Бу йогары савга ога медицина куллыкшысынынъ куьнинде тапшырылды.
Яс кыскаяклы дайым да оьзининъ билимин оьстируьв уьстинде ислейди, туьрли курслар оьтеди. Тезден онынъ исинде аьли де бир ийги туьрленис болаяк. Ол 52-нши номерли КДЦ-нынъ эртенъги стационарынынъ тамада медсестрасынынъ исин юритеек. Яс куллыкшыды биз алган савга ман кутлаймыз эм алдыда иси мен байланыслы йогары уьстинликлерди эм ниетлери толганын йораймыз.
Н.КОЖАЕВА.
Суьвретте: Б.МЕЖИТОВА.