Хатынлар бактылары. Олардынъ кайбирисининъ акында китап язбага болады. Бир-бирисиннен баскаланса да, сол бактылардынъ бир ортаклыгы бар – кыскаяклылардынъ наьсиби. Кашан да, наьсипти биз, хатынлар, туьрли этип коьремиз, биревлер наьсибин – суьйикли исинде, баскалар аьелинде табадылар. Меним хабарым да кыскаяклы акында. Салият Биарслан кызы Трунова наьсипли хатынлардынъ бириси деп ойлайман мен. Коьплеген йыллар катнаймыз, мен онынъ кайгылы куьнлерине де шайыт болдым, кашан да, сол куьнлердинъ ашшы коьзяслары кыскаяклыдынъ янында яралар калдырган, болса да бир куьн де мен Салиятты мунълы этип коьрмегенмен. Аьр заман ярасык, аьр заман юзинде – яркыраган куьлемсирев. Сол да кайдай уьйкен наьсип. Наьсип онынъ аьптелерине, онынъ аьвлетлерине эм оны ман катыскан баьри инсанларга.
Меним эсиме американ актеры, музыканты Джонни Депптинъ айткан соьзлери туьсти: «Хатынлар бизден куьшли. Олар тек маьнели затларды коьредилер. Яшав. Балалар. Эркинлик. Дайымлык яшав оларга керек тувыл, неге десе олар саьбийлери яшаган шаклы яшайдылар. Хатынлар куьш пен бир ерди де алмайдылар, савлай дуныя булай да олардыкы, неге десе олар яшав эндиредилер дуныяга». Сол соьзлердинъ аьр бирисин мен Салиятка келистиремен.
Салият Ногай районынынъ Калинин авылында уьйкен, татым Аджигайтаровлардынъ аьелинде тувып-оьскен. Янъылыс болмаса, ол уьйде кызлардынъ энъ кишкейи болса ярайды. Биарслан эм Шопалав Аджигайтаровлар балаларын кишкей заманнан алып ислеп уьйрететаган болган. Соьйтип, Салият оьз балалыгы акында хабарласа, коьз алдына ферма келеди. 2-нши класстан алып ол анасына сыйыр савмага коьмек этетаган болган, сонъ атасы ман мал баккан. Аьлиги заманда да ол малды суьеди, атларга суьйимди онынъ юрегине атасы эндирген, сол суьйим таркамайды, аьлиги заманда Салият темир атка олтырган, автокоьликти айдайды.
Мектебти тек бесевлерге битирген сонъ, Салият Хасавюрт каласынынъ авылхозяйстволык техникумына туьседи эм сол окув ошагын да йогары уьстинликли кутарган. Сонъында Салият авылхозяйстволык институтынынъ экономикалык факультетинде окыйды эм «бухгалтер эсап бойынша экономист» деген кеспиди байырлайды.
Кайсы ерде ислесе де, Салият Биарслан кызы оьзин бажарымлы, билимли куллыкшы этип коьрсетеди. Ногай орманлык хозяйствосында Салият Трунова 6 йыл иследи, сонъында Ногай районы бойынша Дагрегионгаз организациясына бухгалтер-кассир болып туьсти. Аьлиги заманда Салият Биарслан кызы газ хозяйствосынынъ контролеры болып куллык этеди.
Кыскаякладынъ куллыгы тынышлардан тувыл, халк пан ислеген аьрекет аьр заманда да кыйынлы болган. Аьлиги коронавируслы инфекция ман байланыста боьтен де кыйын, сакланмаса болмайды.
Салияттынъ эткен куллыгы белгиленмей калмады. Ийги иси уьшин хатын коьплеген Сый грамоталарга тийисли болган. 2015-нши йыл Салият Биарслан кызы Труновага «Газпром межрегионгаз» ООО генеральный директоры К.Селезневтынъ атыннан йогары производстволык коьрсетуьвлери уьшин, газ тармагын оьрлендируьвге оьз уьлисин косканы уьшин эм газ эм нефтяной промышленностьтининъ куллыкшыларынынъ куьнин байрамшылав ман байланыста Разылык хат тапшырылган.
Уьстимиздеги айдынъ басында «Газпром межрегион Махачкала» ООО организациясында газ эм нефтяной промышленностьтининъ куллыкшыларынынъ байрамы озды. Гендиректор Александр Давыдов ийги деген контролерларга савгалар тапшырылды. Олардынъ сырасында Салият Трунова да бар. Бу куллыкта ол йырма йылдан артык ислейди.
Салияттынъ балалары – кыскаяклыга энъ де уьйкен наьсип. Уьйкен кызы Эльмира Сахалин аралында яшайды, врач-невропатолог болып ислейди, эри Заурхан ман эки увыл оьстиреди, увылы Олег Георгиевск каласында МЧС колледжинде 3-нши курста окыйды, Элиза кызы – Буденновскта медколледжде 1-нши курсынынъ студенткасы. Балалар оьсип, анасынынъ канаты астыннан ушып кеттилер. Анадынъ юреги аьр бириси уьшин авырыйды, кыйланады. Эри Андрей дуныядан кешип кеткенде, балалар кишкей болып калды, Салият сол йойымды юрегиннен оьткерип, йыласа да, балаларын оьстирмеге, тийисли этип тербияламага куьш тапты. Сол да баьрисине де берилмейтаган касиет.
Салият пан соьйлесенъ, коьнъилинъ коьтеринъки болады. Маскарашыл, оьткир тили мен ол аьр бир аьдемнинъ коьнъилин коьтерип, юзине куьлемсирев эндирип болатаган хатын. Бир-бир заманларда Салияттынъ оьткир тилине туьсип калмайым деп те ойлайман. Болса да оны ман аьр бир йолыгыс бизге, ювыкларга, яркын куьндей болып юрегимизге бек якын болады.
Мен ак юректен Труновлардынъ аьелине коьп ийгиликлер йорайман. Балаларына, тувган-кардашларына эткен яхшылыгы аьр заманда алаллык болып кайтсын. Савлай дуныяда эмишлик болсын деп кайбиримиз де тилек тилеймиз.
Г.Бекмуратова.
Суьвретте: С.Трунова.
