Гульшаар Мавлидиновна Юзманбетова акыллы, туврашыл деген аты ман, сыйы ман белгили. Онынъ окытувшы кесписин сайлавында анасы уьлги болгандыр, неге десе Нафисат Магруповна Джумалиева коьп йыллар узагына Эдиге авылдынъ орта мектебин етекшиледи, районда ийги деген окытувшылар сырасын толтырды.

Гульшаар Мавлидиновна 1987-нши йылда Дагестан оькимет педуниверситетининъ баслангыш классларынынъ факультетинде окып баслайды. Окувын кутарганнан сонъ, яс кыз тувган Ногай шоьлде аьрекетин бардырады. Аьли ол Эдиге авылынынъ орта мектебининъ директорынынъ тербиялав бойынша орынбасары болып куллык этеди. Гульшаар Мавлидиновна баслангыш классларынынъ окувшыларын окувга, язувга, эсапка уьйретип калмай, оларды тербиялайды. Мектебте куллык эткен биринши йыллардан алып ол оьзин билимли окытувшы этип коьрсетти. Баьри куьшин балаларга билим беруьв эм тербиялав исине багыслады. Гульшаар Мавлидиновна «РФ ортак билимлендируьвининъ сыйлы куллыкшысы» деген атты казанган, ол йогары категориялы окытувшы. Окытувшы бир неше Сый грамоталар ман савгаланган. Ол районнынъ окытувшыларына коьп кере ашык дерислер берген.
Гульшаар Мавлидиновна бу куьнлерде оьзининъ окувшылары ман оьктемсийди. Олар оьзлерининъ ислерин яваплы толтырадылар, сыраларында баска эллерде ислегенлер де бар.
Гульшаар Мавлидиновна тек оьз исине маьне берип калмай, ян косагы ман бирге оьзлерининъ балаларына да ийги тербия эм билим берген.
Д.Джумаева.