«Ногай ДЭП-29» ООО предприятиесининъ ис коллективиндеги йол куллыкшылары арасында кыскаяклылар да ислейдилер. Олар куьн сайын Кизляр – Терекли-Мектеб – Ставрополь крайынынъ япсары деген автомобиль йолынынъ эки де бойындагы кокысларды йыйнайдылар, йол белгилерди, бодюрларды сырлайдылар. Сонынъ сырагысында биздеги йоллардынъ коьрки де тазаланады эм яхшырады.

Янъыларда Йол хозяйство куллыкшылар куьни алдында «Ногай ДЭП-29» ООО директоры Джамбулат Караев ис коллективти кеспи байрамы ман кутлаган. Сол йыйында район йол хозяйствосынынъ етекшиси коллективте ислейтаган хатынлар: Тотай Елакаевадынъ, Фатима Ярболдиевадынъ, Шарбийке Нурлубаевадынъ эм Рая Саидовадынъ ис аьрекетине йогары белгисин берген. Оларды Дагестан Республикасынынъ йол хозяйство эм коьлик министри эм оьзининъ атыннан йылы кутлаган эм Сый грамоталары ман акшалай баргыларын тапшырган.
«Бу хатынлардынъ эткен кыйыны коьп мактавлы соьзлерге тийисли, неге десе олар бизим куллыгымыздынъ тамамын эл алдында таза эм коьрнекли этип коьрсетпеге шалысадылар», – деген район йол предприятиесининъ етекшиси.
Бизим хабаршы.
Суьвретте: (солдан онъга) Фатима Ярболдиева, «Ногай ДЭП-29» ООО директоры Джамбулат Караев, Шарбийке Нурлубаева эм Тотай Елакаева.