Дагестан Республикасынынъ Ногай районында вакцинация этилуьв белсен юритиледи. Куьн сайын вакцинация этилинетаган кабинеттинъ алдында уьйкен шерет болады. Район яшавшылары аьли уьшин оьзлерининъ савлыклары акында ойланып, коронавируслы маразына карсы турув вакцинады оьтедилер. Сол вакцинады алганлар санында Ногай районынынъ РЭС куллыкшылары да бар. Олардынъ етекшиси Рамиль Муслимовтынъ билдируьвине коьре, бу куьнлерге энергетиклердинъ 70 проценти коронавируслы маразына карсы вакцинады алганлар.

– Бизим кеспимиз сондай, бизге аьдемлер мен йыйы катнаспага туьседи. Сога коьре, биз оьзимизди де, аьеллеримизди де коршалар уьшин, ис коллективимиз бен бирге вакцинацияды оьтпеге соьйлесип, карар алдык. Мен оьзим уьстимиздеги йылдынъ коькек айында биринши вакцинады алган эдим, уьш юмадан сонъ, экинши кезегин де оьттим. Аьли уьшин, Госуслуги порталы аркалы шеретте турган йолдасларымыз да бар. Биз коьп кешиктирмей, вакцинацияды коьп сан аьдем оьтсе, аьруьв болар эди. Бизим танысларымыз, ювыкларымыз, досларымыз больницага сийрек туьсер эди.
Коронавируслы мараз – бек авыр эм зарарлы авырув. Бу мараздан оьткен йыл бек коьп аьдемлер тыншайдылар. Бир орамда, бир неше уьйде сол мараздан оьлген аьдемлер де болып кеттилер. Сол заманды эсиме алсам, юрегимде коркыныш тувады. Сондай кыйын аьллерге калмас уьшин, вакцинады алмага – бизим борышымыз. Россия вакциналарынынъ пайдасы болмаса, зарары йок, медицина аьлимлерининъ айтувына коьре, солар энъ де ийгилер саныннан, – дейди Рамиль Муслимов.