Ногай район администрациясынынъ кезекли аппарат кенъесинде сонынъ катнасувшылары Ногай патшалык драма театрынынъ эм район Орталык китапханасынынъ 2022-нши йылдынъ ис сырагылары акында соравларды ойластылар.
Шарада Ногай район администрациясынынъ аькимбасы Джамалутдин Эсиргепов, онынъ орынбасары Хамидулла Саитов, район администрациясынынъ куллыкшылары, авыл поселение аькимбаслары, республикалык эм район учреждениелер мен организациялар етекшилери ортакшылык эттилер.
Кенъестинъ баслапкы соравы бойынша Ногай патшалык драма театрынынъ художестволык етекшиси эм бас режиссеры, ДР халк артисти Байсолтан Джумакаев шыгып соьйледи. Онынъ айтувы ман, театр коллективи былтыр патшалык тапшырмады толтыра берип, 1 млн. 110 мынъ маьнет акша казанган, 16 мынъ каравшыларды канагатлаган, 122 спектакльлер ойнап коьрсеткен. Соны ман бирге оьткен йыл балалар уьшин де «Буратино» эм «Алладин» деген эртегилер сценага салынып коьрсетилген. Сондай постановкалар ман озган йыл театр Манастан алып Черкесскке дейим гастрольлер мен юрген.
Театрдынъ аьрекетин ийгилендируьвге буршав беретаган маьселелер арасында Б.Джумакаев спектакльлерге келетаган каравшылар санынынъ оьлшемин белгиледи. «Залда мен бизим эрлерди сийрек коьремен. Спектакльге коьп дегени 30-40 эм соннан да аз каравшылар йыйыладылар. Бизим театр Дагестанда ийги дегенлердинъ бириси. Бизи мен ислемеге суьедилер. Мени, мактанып айтпайман, коьп театрлар постановкалар этпеге шакырадылар. Былтыр мен лезгин, авар театрларында куллык эттим, Крым театры да шакырган. Тек бизим каравшылар оьз миллет театрынынъ сцена куллыкларын коьрмеге келмейтаганы юрекке авыр болып тиеди», – деп билдирди оьз ойын оьнер коллективтинъ басшысы.
Айтылган маьселе бойынша оьз ойларын район етекшиси Д.Эсиргепов, район администрациясынынъ куллыкшысы Р.Гапаров айттылар. Олар миллет ногай театрын колтыкламага керегин билдирдилер, Б.Джумакаевке спектакльлерге билетлерди баьри учреждениелер эм организациялар коллективлерине сатпага маслагат эттилер.
Район орталык китапханасынынъ 2022-нши йылда эткен ислери акында эсап беруьв доклады ман ЦРБ директоры Сабират Абубекерова хабарлады. Ол авыл китапханаларынынъ маьселелери акында айта келип, солардынъ куллыкшыларынынъ кыйын акынынъ тоьменлигин белгиледи. Сол ок заманда Нариман авылында китапхана кулланувга яравсыз меканда, Батыр-Мурза, Шумлелик, Ленин авылларында – китапханага деп ярастырылган меканларда, а Калинин авылында болса мекан йоклыктан китапхана библиотекарьдинъ уьйине коьширилген.
Кенъестинъ ызында район еринде юкпалы авырувларга карсы юритилетаган вакцинация иси акында Ногай ЦРБ бас врачы Фаризат Межитова билдирди.
М.Юнусов.
