«Шоьл тавысы» республикалык газетамыздынъ оьз хабаршылары «Сиз зарарлы коронавируслы маразга карсы вакцинады алаяк ойынъыз бар ма?», – деген соравды берип, тийисли яваплар да алдылар.

Аьли соравга Орта-Тоьбе авыл яшавшысы, яшавшыларды социаллык яктан коршалав тармагынынъ куллыкшысы Ралина Ибрагим кызы Отегенова (суьвретте) яваплайды:
– Мен бардыратаган ис аьрекет аьдемлер мен тар байланыслы. Биз оьзимиздинъ ис коллективимиз бен авыл еринде ясуьйкенлерге, ярдам керекли аьдемлерге тез-тез барып турамыз. Сол бизим аьрекетимиздинъ тувра борышы болады. Арамызда медицина куллыкшысы да бар. Ол да эситкен, авырув акында билген затларын айтып, анълатув этеди. Оьзимиз де юре, аьдемлер мен хабарласа келип эситемиз, коьп аьдемлер маразга карсы вакцинады алганы акында. Мен болсам, вакцинады, бизим районымызга биринши кере аькелген куьнлерде, эттиргенмен. Сога бир де оькинишим калмады. Оьзим канагатлайтаган ясуьйкенлерге де йигерли кепте бараман, оларга авырув аькелмегениме эм олардан да мага бир зарар да келмеегине сенип. Ясуьйкенлерге де оьзимнинъ билгенимди айтаман, авырувдынъ авырлыгын да анълатпага шалысаман. Араларында меним соьзиме тынълап, вакцинады эттиргенлер де бар. Бу куьнлерде савлыгымыздынъ онъайлыгы бизим оьзимизден де себепли болады».