Бала баьримизге де ортак. Аьелде саьбий тувып-оьссе, кайбиримизге куваныш болады. Муслим эм Эльмира Кожаевлердинъ увылы Курбан тек туьнегуьнлерде «Ногай Эл» балалар бавынынъ выпускниги болды. Курбан – оьткир, баьри затты да билмеге суьйген, оьз тенълериндей болып, токсан тогыз соравлар беретаган бала деп айтадылар уьйдегилер. Сондайларга «не уьшин» деген ат беремиз ше оьзимиз де. Курбан балалар бавында болган баьри шараларда катнасатаган эди. Грамоталары да аз тувыл. Соьйтип, Ана куьнине багысланган «Анама – шешекей» деп аталган яратувшылык конкурсында катнасып, энъ де ийги иси уьшин «Ногай Эл» балалар бавынынъ етекшиси Н.Юнусова атыннан грамотага тийисли болган. Тербиялавшылары Сакинат Солтанмурат кызы Зарманбетова эм Марина Мол-Магомед кызы Курманбаева Курбаннынъ акында тек ийги соьзлер айтадылар. Оларга тербиялап, оьстирген балалар ман аманласпага бек кыйын. Курбанга олар мектебке барып, уьстинликли окыганын йорайдылар.
Балалар бавын битирип, яшавдынъ тагы да бир кезегине абыт этип турган Курбанды уьйкен тетейи Аминат Муслим кызы Кожаева, атайы, тетеси, абалары, ата-анасы эм баьри кардаш-тувганлары кутлайдылар. Олар баладынъ биринши документи – балалар бавын битирген акында шайытламады алганына бек суьйинедилер. Курбанга уьстинликлер, окувында берк билим алсын деп йоравлар айтадылар. Биз де сол йоравларга косылып, ак юректен тек бесевлерге окып, ата-анасын, окытувшыларды тынълап, йигерли болсын деп айтамыз.
Г.Бекова.
Суьвретте: Курбан Кожаев.