Уллы Аталык йылларында совет аьскершилери мен коьрсетилген йигитлик акында коьп ятлавлар да, китаплер де, йырлар да язылган. Тарих бетлеринде коьплеген баьтирлердинъ атлары кан ман, юректинъ сызлавы ман дайымларга язылып калган, мен де бу хабарымда оьз атайым Махач Якуб улы Якубовтынъ акында айтпага ниетленемен.
Меним атайым Бабаюрт районынынъ Губечиаул авылында 1919-ншы йылдынъ курал айынынъ 25-нши куьнинде тувган. Онынъ балалыгы сол йыллардынъ ашлыгына, кыйынлыгына куьйген. 1940-ншы йыл атайым Совет аьскерлер сырасына шакырылады. Дав басланган заманда, ол Бессарабияда куллык этеяткан болган. Согысты атайым 35-нши мергин-минометлы пехота полкынынъ сырасында оьткен. Бу полк аьр заманда да алдышы болган деп хабарлайтаган эди атай оьз аьвлетлерине. Ол меним тувганымды коьрген, ама ол меним эсимде йок.
Белоруссия еринде каты согысувлар заманында атайым бир эки йолдасы ман корсалавга туьседи эм есирге алынады. Эки ай болган ол явларда есирде, не де коьрген сол айлардынъ ишинде, ама фашистлердинъ алдында басын да, тизин де тоьмен салмаган. Ол тек оьзининъ тувыл, ердеси Алимхан Аташевтинъ яшавында куткарган есирде, коьплеген йыллар олар катнаганлар, сол дослык несилден-несилге коьшеди, аьлиги заманда биз де Аташевлердинъ аьели мен тар катнасамыз.
Согысувлардынъ бирисинде командирин куткарам деп, атайым оьзи аягына каты яраланады. Айлак куьшли болган ярасы, сога коьре врачлар онынъ яныннан кеше-куьндиз таймаганлар, эмленген сонъ Махач-атайым оьз полкына кайтып келип, фашистлер мен согыскан.
Енъуьв куьнин атайым Брест беркитпесинде карсы алган. Оннан оларды Япония ман согыска йибергенлер, эки ай юрдилер олар савлай Россия ман. Давда коьрсеткен йигитлиги уьшин Аталыгы коьплеген орденлери, медальлери мен савгалаган. Энъ де сыйлы деп атайым «Германияды енъгени уьшин» медальди санайтаган эди. онынъ согыстынъ кыйынлы йоллары ман юргенин омыравындагы белгилери шайытлайтаган эди. авылга кайтып
келип, Махач-атайым тынышлы яшавды курувда коьп куллык этти. Сол иси уьшин ога «Сый белгиси» ордени тапшырылган. Ызгы йылларын ол Глав.Сулак поселогында яшаган.
Мен атайымды аьр заманда да эсимде саклайман эм аьлиги тынышлы яшав уьшин савбол айтаман.
Муслимат Терикова
Сургут каласы.
Суьвретте: М.Терикова атайынынъ суьврети мен
