Дагестанлы Джавад Мамутов (суьвретте) Украина еринде озгарылатаган спецоперациясында йигитлик коьрсеткени акында уьстимиздеги йылдынъ 27-нши куьнинде телевидениединъ Биринши орталык каналында айттылар. Тамада лейтенант Джавад Мамутов оьзининъ ракеталы эсабы ман караклардынъ ети оперативли-тактикалык куьплерин, бир аьскерши аэродромды эм уьш ПВО тармакларын бузгышлаган.
Россия Федерациясынынъ коршалав министерствосы РФ Савытлы куьшлерининъ аьскершилери Украина еринде коьрсететаган йигитлиги акында «Бизим баьтирлер» деп аталган рубрика астында Орта телевидениесинде коьрсетуьвди бардырады. Яв ман куьресуьвде аьскершилердинъ байыр туьзилиси оьзлерининъ кеспи усталыкларын, йигерлигин эм йигитлигин коьрсетип келедилер.
Тамада лейтенант Джавад Мамутов Украина еринде озатаган специальли операциясында баслапкы куьнлерден алып катнасып келеди. Ол оьзининъ алдына салынган борышларын Донецк эм Луганск Республикаларын коршалавда толтырган.
Бу урыста тамада лейтенант Джавад Мамутовтынъ алган токтасына коьре, украин националистлерининъ куьшлери коьпке кемиген. Сол Россия Федерациясынынъ аьскершилерине алдыга бармага да амал берди. Сонынъ акында «Звезда» телеканалында билдирилген.
Уьйкен оьктемлигимиз бен ердесимиз Джавад Мамутовтынъ эткен йигитлиги акында айтып, онынъ ата-анасына сондай йигерли йигитти тербиялаганына разылыгымызды билдиремиз.
Джавад Мамутов Ногай районымыздынъ Терекли-Мектеб авылыннан болады. Оьзи А-Х.Джанибеков атындагы орта мектебин окып кутарганнан сонъ, Санкт-Петербург каласындагы Аьскерши Академиясын йогары белгилерге окып битирген. Онынъ атасы Мурат Афганистан еринде озган урыслардынъ катнасувшысы. Ол да бир неше Оькимет баргыларынынъ иеси болады. Аьлиги заманларда Мурат Арслан увылы Мамутов «Ногайский район» МР администрациясында ис аьрекетин бардыра келип, сый-абырай казанады, тек янъыларда ол Дагестан Респуб- ликасынынъ Аькимбасынынъ аты ман аталган саьат пен савгаланды.
Джавад болса, оьзининъ эткен иси акында, каьмбиллиги мен атасына билдиргенде: «Мен Элим мен алдыма салынган борышты толтырдым», – деп айткан.
