15-нши февраль – Афганистаннан совет аьскерлерин шыгарув куьнинде Ногай ра- йон орталыгы Терекли-Мектеб авылынынъ паркындагы Афган согысынынъ катнасувшыларына багысланган эстелик янында митинг оьтти.

Афганистан согысынынъ ветеранларын район аькимбасы атыннан онынъ орынбасары Баймагомед Ярлыкапов кутлады.
Митингте район Депутатлар Йыйынынынъ председатели Джамалутдин Эсиргепов, Афганистан согысынынъ ветеранларынынъ район советининъ етекшиси Сталинбек Култаев шыгып соьйледилер эм бу эстеликли куьнде элимиз сол согыстынъ катнасувшыларынынъ йигитлигин эм эрлигин оьрметлейтаганымызды белгиледилер.
Митинг ортакшылары эстеликке шешекей байламларын салдылар.
– Муннан отыз уьш йыл артта бизим аьскершилер Афганистаннан, тек янъыларда соннан шет эллердинъ аьскерлериндей кашып тувыл, а басларын йогары коьтерип, согыс байракларын елпилдетип шыкканлар. Бу тарих оьзгерислеринде бизим ердеслеримиз де йигитлерше катнасканлар эм оьз эли алдында аьскершилик борышын эр кимик толтырганлар. Олар баьриси де оькимет савгаларын алганлар. Биз буьгуьн оларды оьрметлеп, сол йылларда коьрсеткен шынты эрлиги эм баьтирлиги уьшин олардынъ аьр бирисине разылык билдиремиз, – деди Ногай район администрациясынынъ аькимбасынынъ орынбасары.
Суьвретте: митинг ортакшылары.