Аьр аьдемнинъ яшавынынъ бир шагы – яслык. Сол шакты аьр бир аьдем оьзининъ оьмирининъ энъ де саьвлели эм наьсипли шагы деп санайтаган болар. Сол шагын ясуьйкенлер эслерине алсалар, юзлерине нур энип, коьнъиллери бир аьлемет кувнак та болып кетедилер.
Яслар куьни бизим Россия элимизде коьптен бери белгиленип келеди, 1993- ншы йылга дейим бу куьн «Совет союзынынъ яслар куьни» деп аталатаган эди.
Яс аьдем – элдинъ келеектегиси эм тиреви. Онынъ буьгуьнги бактысыннан коьп зат себепли болады десек те ялган болмас. Онынъ ойлары да коьп эм бир ерлерде айлак та терен де болып кетеди. Бу йыл да Россия ясларынынъ куьни июнь айынынъ 27-нши куьнинде календарь бойынша белгиленеди. Оьзининъ йогары уьстинликлери мен йолыгады бу байрам куьнди Динара Байрамали кызы Юнусова.
Динара 2016-ншы йылда Ногай районымыздынъ Червленные Буруны авылынынъ З.Акмурзаев атындагы орта мектебин уьстинликли окып кутарып, Пятигорск каласындагы Россия Федерациясынынъ Президентиндеги Патшалык службасы эм халк хозяйстволык Россия Академиясына окымага туьседи.
– Окув йылларым бек кызыклы оьттилер, аьр бир семестр сайын янъы кызыклы сабаклар меним сайлаган кеспиме суьйимди куьннен-куьнге арттыра эм берките берди. Йогары окув ошагында озгарылатаган коьп шараларда катнастым. Аьр бир шарада савгалы орынга тийисли болатаган эдим, – дейди Динара Юнусова.
Мектебте окыган йылларында да Динара тарих, обществознание эм эсап сабакларын бек суьетаган эди. Бу сабаклардан район, республика кезеклеринде оьткен олимпиадаларда да оьз билимин коьрсетип, туьрли дережели дипломларга тийисли болатаган эди. Динара мектебти тек бир «доьрт» белгиси болып, калганлары «бес» белгилери мен кутарган эди.
– Оькинишим сол, меним мектебти сондай уьстинликлер мен кутарганымды анам Залина коьрмеди. Ол эртеректен бу яшавдан кешип кетти. Кайдай мага коьмеги тиетаган эди анамнынъ. Ол мага мектеб йылларда кайсы ерде де колтыклав этип турды. Ол мага аявлы ана эм кыймас та эди. Экевимиз коьп сырларымыз бан боьлисип туратаган эдик. Мен анама бир затты калдырмай, сырларымды айтатаган эдим. Анадан сонъ биз бир канаты сынган карлыгашлардай болып калдык, тек атам бизге оьзининъ баьри яшавын савгалады деп айтпага боламан. Мен эм меним кишкей синълим Айнара анасыз да яшап уьйрендик, – дейди Динара коьнъили куьнъирт болып.
Яшав алдыга барады, анасынынъ эстелигине, онынъ балаларына салган сенимин аклап, буьгуьнлерде Динара Пятигорск каласындагы Россия Федерациясынынъ Президентиндеги Патшалык службасы эм халк хозяйстволык Россия Академиясын кызыл дипломга битирди. Энди Динарадынъ алдында кенъ яшав, ол суьйикли кесписин де алды. Ис аьрекетин де соьйтип йогары дережеде бардыраягына бек сенемиз. Келген Россия Яслар куьни Динара Юнусовага тек яхшылыклар аькелсин, яшавынъ тек наьсипли куьнлер мен толсын.
Г.Курганова, РФ Журналистлер союзынынъ агзасы. Суьвретте: Д.Юнусова.
