Джамбулат Бальгишиев шет эллер тилиннен олимпиада бойынша Россиядан 500 катнасувшы сырасында энъ де йогары баллар алган. Ястынъ уьстинлиги акында ийги хабар халкымызды бек суьйиндирди эм оьктемситти. Ногай яслар сырасында тек куьш-куватлы тувыл, йогары билимли яслар да аз тувыл. Олимпиадада енъуьв ногай ястынъ алдында янъы йоллар ашады.

Махачкала кала лицейининъ 11-нши классынынъ окувшысы Джамбулат Бальгишиев Россия бойынша озгарылган английс тили бойынша олимпиадада енъуьвши болган, ол – энъ биринши орында. Онынъ анасы Савкат Амзатхан кызынынъ айтувына коьре, Джамбулат шет эллер тили мен 1-нши класстан алып кызыксынып баслаган. Сосы тилге суьйимди, окувга талпынувды балага синъдирген эм дайым да коьнъиллендирип турган окытувшысы Лейла Алисултан кызы Абачараева. Эндиги енъуьвши болганы Джамбулатка Россиядынъ энъ ийги ВУЗ-ларына туьспеге амал береди.
Мен сосы билимли эм эдаплы кеде акында оны тербиялап оьстирген, канатландырган анасы Савкат Амзатхан кызы ман хабарласканда, сосы яс, суьйдимли кыскаяклыдынъ терен акылына, сезгирлигине эм ишки байлыгына тамаша эттим эм, оьзек те, сондай анада баска увыл тувып болмаяк эди деп ойладым.
Джамбулат эки ясына толмай элиппедеги баьри аьриплерди уьйренипти, эки яс ярым заманнан алып эжиклеп окып баслапты. «Сен меним энъ акыллым, сен данъклы боларсынъ, окув-наьсип ашкышы!», – деп айтып турган анасы. Бала бавыннан алып Джамбулат бавырмалы, юмсак кылыклы болып оьскен, бир де тоьбелеспеген, биревди де оьпкелетпеген. Биринши кере мектебке барганда, «Академия детства» деп аталган баслангыш класста окыган. Бесинши класста сынавларды тек беслерге берип, республикамыздынъ оьнерли балалар окыйтаган туьрли тармаклы лицейине окымага туьскен. 6-ншы класста ол бир йыл Москва каласындагы мектебте окыган эм тенълери арасында билим яктан биринши орында болган. Биринши класстан алып 11-нши класска дейим тек беслерге окып келген. Окувдан баскалай бос заманларында футбол ойнамага суьетаган болган, ютуб каналга футбол акында туьрли видеолар да салып турган. Былтыр элимизге кыйынлык туьсип, мараз мезгилде, аьдемлер уьйлеринде есирде тургандай болып олтырганда, Джамбулат тилге суьйимлигине ыспатлык этип француз тилин уьйренип алган. Тамаша тувыл ма! Коьп китаплер окымага суьеди, Теодор Драйзердинъ «Финансист» деген китабин английс тилинде окып кутарган. Анасы Савкат оны дайым да аьлеметликке, оьзине ынандырып, бу дуныяда баьри зат та сенинъ оьз колынъда деп уьйретип оьстирген. Савкат оьзи де дайым да билимге талпынып турган, увылыма коьрим болайым деп шалыскан. Оьзинъди суьйип, оьзинъе ынанып яша деген сенимди синъдирип турган. Сондай талаплы ана оьзи де яшавында алдына мыратлар салып, оларга оьз йигерлиги мен етип турган. Джамбулат анасынынъ бир соьзин де ерге туьсирмей, оны анълап, коьнъилине етпеге шалысып турган. 2019-ншы йыл ол Лондонда болып келди. «Мага увылымды сав язга алыс шет элге йибермеге авыр болса да, билимин оьстирмеге керек, коьрсин, уьйренсин деген ниет пен йолга салдым!», – дейди ана оьзеленип.
Мектебте бирге окыган тенълери арасында да Джамбулат Бальгишиевтинъ сыйы, абырайы бек уьйкен, онынъ аьдемшилиги, туврашыл кылыгы баьрине де ярайды. Кайсы авыр аьлден де тыныш шыгып болатаган, досларына тувра маслагат беретаган ногай йигит.
Мине Савлайроссиялык олимпиададынъ енъуьвшиси болып, ол оьзине савлай журналистлердинъ эслерин каратты, шилле айынынъ 1-нши куьнине оны Дагестан Республикасынынъ Аькимбасынынъ кесек заманга куллыгын юритуьвши Сергей Меликов йолыгыска шакырады. «Дагестанская правда» газетасы хабарласув уйгынламага деп тел соккан. Эне сондай бизим Джамбулаттынъ бийик етимислери, кайдай куьез анага, баьри ювыкларына, окытувшыларына, савлай шоьлимизге, республикамызга. Джамбулат Бальгишиевке йораймыз бийиктен-бийик етимислерди, коьп енъуьвлерди, ногай йигит сондай бийикликке етискен деген ийги хабар сав дуныяды айланып шыксын.
С. Майлыбаева.