Аьр бир ердинъ бас оьктеми – аьдемлер, олардынъ кайратлы иси, яратувшылык ойлары, оьз Элине, тувган ерине алаллыгы. Оьз яшавын халкына, суьйикли исине багыслап яшаган инсан йогары савга тийисли болады. Баймагомед Амин увылы Ярлыкапов коьплеген йыллар правосаклав органларында ислеген. Кайдай яшав аьллерде калса да, ол бир де аьдемшилик, намыслык, халкына куллык этуьв касиетлерин йойытпаган. Буьгуьнлерде онынъ коьплеген йыллардан бери районымызды, республикамызды оьрлендируьв уьшин эткен исине маьне берилгени баьримизге де суьйинишли болады.

«Ногайский район» МР аькимбасынынъ кавыфсызлык бойынша орынбасары Баймагомед Ярлыкапов исинде етискен уьстинликлери уьшин Дагестан Республикасынынъ Сый грамотасы ман савгаланган. Савгады ога ДР Оькиметининъ председатели Абдулмуслим Абдулмуслимов тапшырган. Баймагомед Амин увылын тийисли савга ман кутлаймыз эм аьли де куллыгында уьстинликлер сагынамыз.