Кайсы яс аьдем – мен келеекте ким боларман, сайлаган кеспим мен аьрекетимди бардырарман ма яде болса, мен кайтип кеспим бойынша оьсер экенмен, – деген ойлар ман йолыгыспай болмайды. Мектебти кутарган аьдем янына якын кеспиди сайлайды, сол кеспидинъ сырларына да уьйренмеге болады, ама солардынъ коьбиси келеектегиси акында терен ойланып карамайды, деген ой мага келеди, неге десе мен оьзим де сол яшав шагын оьткенмен.
Ногай районымыздынъ Кадрия атындагы орта мектебин йогары уьстинликлер мен тамамлаган, энеси аявлап эм аьдуьвлеп оьстирген Заира Арслан кызы Аженьязова алдында да кеспи сайлав борышы болган. Бес йыл артта ол английс тилин уьйренип, сол йол ман бармага ниети бар эди. Сол янына якын болып коьринген кеспиди де сайлап, Сочи каласындагы йогары окув ошагына туьскен эди, ама бир йылдан сонъ, оны Россия Федерациясынынъ бас каласы Москва оьзине тарткандай болып, Заира суьйикли энесининъ разылыгын алып, Г.Плеханов атын юритетаган йогары окув ошагынынъ юридический факультетине окымага туьсти.
– Заирадынъ окувга ымтылысы айлак эрте басланды. Мен оны мектебке бармага шагы толысынша етпей (сол йыл Кадрия атындагы мектебте биринши класска баратаган балаларды Гульсагира Абдулкадыр кызы Сахтаева алган эди, бу куьнлерде ол бизим арамыздан кеткен, ама эс тири), тилеп, биринши класска олтырттым.
Меним йиенимди коьрген Гульсагира Абдулкадыр кызы, оьз сулыбына коьре, «Мундай кишкей балады кызганмай мектебке неге береди экенсинъ», – деп те айткан эди. Тек окув бойынша тартпаса, оьзи де арыса, мен кызымды кайтарып аькетпеге соьзимди бердим. Тартув тувыл экеш, тек бес белгилерге окып та битирди. Аьли уьшин сол айтылган Г.Плеханов атындагы окув ошагын да кызыл дипломга тамамлап туры, – дейди, суьйиниши кушагына сыймаган, Заирадынъ энеси Сакинат Казув кызы Шураева.
Сакинат Казув кызы Ногай район орталык больницасында коьп йыллардан бери куллык этип келетаган сулыплы врач. Ол оьз яшавын йиени Заирасыз коьз алдына аькелип болмайды, Заира онынъ сав яшавы болып келеди. Ол оны уьш айлык бала этип, бактыга коьре, койынына алган. Бос заманды да онынъ тербиялавына багыслаган. Балады оьстируьв тынышлардан тувыл: ога акты да, карады да анълатув, яхшыды эм яманды айырып болувды коьрсетуьв…
– Мен оьзим Заира ман бирге бала эм оьспир шакты да кайтадан оьттим. Оны ман биз экевимиз балалар бавыннан кайтканда, коьп заманды таза ава ман тыныс алувга, Терекли-Мектебтинъ айтылган паркында кыдырып, йиберетаган эдик, – дейди ясуьйкенимиз.
Заира Арслан кызы Аженьязова мектеб йылларында коьп туьрли район, республика кезеклеринде озгарылатаган шараларда катнасып, Кадрия атындагы мектебининъ ийги атын яклап келди. Класс етекшиси Заира Эльгайтар кызы Акимовадынъ айтувына коьре, ол бек талаплы, класс йолдаслары арасында сый-абырай казанган кыз эди.
– Заира мектебте орыс, английс тиллерин эм адабиат сабакларын айлак бек суьетаган эм солар бойынша уьстинликлери де бар эди, – дейди окытувшысы. Заира Аженьязова йогары окув ошагында окыган йылларында сонда да ямагат яшавында белсен катнаскан, волонтер исин уьйкен маьне берип юриткен.
2019-ншы йылда Заира яс аьлим-юристлерининъ XIV Халклар ара мектеб – практикумында ортакшылык эткен. Бу шарада ол оьзине бек коьп пайдалы затлар алган эди.
Бу куьнлерде Заира – кеспили юрист. Онынъ алдында аьли де салатаган мыратлары да бар, эм соларга етисуьв – онынъ борышы.
Энесининъ билдируьвине коьре, Заира бу окув йылды да магистратурада басламага ниетленеди. Тек калганы язылганга коьре болар. Мен болсам, сондай талаплы, билимге ымтылып турган кызга, «Тек алдыга!» деген йоравымды айтаман.
Г.Сагиндикова.
Суьвретте: Заира Аженьязова.
