Халкымыздынъ келеектегиси – ногай ясларымыздынъ бала шактан алып спортка ымтылысы, спорттынъ кеплери бойынша туьрли район, республикадынъ туьрли дережели ярысларынынъ тек катнасувшысы болып калмай, енъуьвши орынларынынъ иеси де болып кайтувы аьр кайсымызда да оьктемлик сезимлерин тувдырмай болмайды.

Замир Ногай районынынъ Батыр-Мурза авылыннан Камиль эм Айгуль Наймановлардынь аьелинде тувган. Буьгуьнлерде 6-ншы класс окувшысы Замир оьз мектебининъ яшавында, спортта белсенли катнасып етимислер коьрсетип келеди. Ол мектеб бойынша озгарылатаган туьрли ярысларда ортакшылык этип коьплеген Сый грамоталарына тийисли этилген. Замир ана, орыс тил эм адабиаты, география дерислерине бек суьйип барады. Бос заманын Замир шатраш пан кызыксынувына, домбырада усташа ойнап уьйренуьвге, ата-анасына уьй куллыкларында ярдамласувга багыслап келеди.
Спорт та Замирдинъ яшавында маьнели орынды тутып келеди. Замир тренери Алибек Каирбек увылы Менласановтынъ етекшилиги мен спорттынъ тайбокс кебиннен сулыбын Олимпиада чемпионы Альберт Батыргазиев атындагы спорт комплексинде оьстирип келеди. Замирдинъ Аталыкты коршалавшылар куьнине багысланып оьткен Ногай районы бойынша тайбокстан ашык турниринде катнасып биринши орынга тийисли болувына да коьп заман болмайды. Сол етимиси уьшин яс Сый грамотасы эм кубок пан савгаланды.
Талаплы ястынъ окувда да, спортта да уьстинликлери адымнан-адым тек оьсип келеегине сенемиз, онынъ алдыда салган кайсы мыратлары да яшавга айланып, йолы дайым етимисли болганын сагынамыз!
Г.Нурдинова.
Суьвретте: Замир Найманов.