Янъыларда Кумлы авыл администрациясында авыл ясуьйкенлер советининъ, Д.Шихмурзаев атындагы орта мектебининъ, «Алтын-ай» балалар бавынынъ, авыл эм мектеб китапханаларынынъ, маданият уьйининъ, Кумлы авылында аьрекет эткен социаллык куллыкшыларынынъ ваькиллери эм сондай баскалардынъ ортакшылык этуьви мен авыл активининъ йыйыны уйгынланып оьтти.

Йыйында авыл администрациясынынъ аькимбасы Сакинат Елманбетова ерли администрациясы язда этилинген ислер акында эсап берди. Оннан сонъ авыл аькимбасы ман Чернобыль АЭС-ында болган баьле-казадынъ калдыкларын тайдырувда катнасувшысы Султанхан Байбошович Заретовка Дагестаннынъ 100 йыллыгына мерекели медали эм авыл администрация атыннан эки мынъ маьнет акшалай баргысы тапшырылды.
Чернобыльши Султанхан Заретовка кутлав соьзлерин авыл аькимбасы Сакинат Елманбетова, Кумлы авыл ясуьйкенлер советининъ председатели Зейнадулла Менлиалиев, Д.Шихмурзаев атындагы мектебининъ етекшисининъ тербиялав иси бойынша орынбасары Феруза Абдунасова, собес куллыкшы Асиет Болатова, авыл яслары атыннан Арслан Кулушев эм сондай баскалар айтып кеттилер.
Оннан сонъ авыл аькимбасы ерли активининъ агзаларын уьстимиздеги йылдынъ кырк кийик эм казан айынынъ ишинде белгиленеек Уллы Аталык согысынынъ 1942-нши йылда Ногай (Караногай) районынынъ фашист-баскыншылардан босатылувынынъ 80 йыллык мерекесин байрамшылав бойынша шараларынынъ планы ман таныстырды эм авылдынъ билимлендируьв, маданият ошаклары эм баскалар арасында шаралардынъ озгарувын уьлестирди.
Г.Нурдинова.
Суьвретте: шара катнасувшылары.