Дагестан Аькимбасы Сергей Меликовтынъ етекшилиги мен янъыларда Дагестан Республикасынынъ экономикасынынъ оьрленуьвининъ берклигин канагатлав бойынша оперативлик штабынынъ кезекли йыйыны болып оьткен.

Куьн йосыгында социаллык объектлерининъ курылысы, республикалык бюджетининъ толтырылувы, мектеблерди капиталлык ярастырув эм инвестиционлык проектлерди яшавга шыгарув соравлары ойласылган. Йыйынды аша келип, регион басшысы янъыларда Дагестанда Бирлескен Араб Эмиратларынынъ делегациясы конакта болганын эм олар ман йолыгыслардынъ тамамында бир неше келисуьвлер туьзилгенин эске салды. Сергей Меликовтынъ айтувы ман, партнерлар аьли ок та Кизилюрт, Хасавюрт, Южно-Сухокумск эм Кизляр калаларды, солай ок Кизилюрт, Хасавюрт, Бабаюрт, Ногай эм Кизляр районларын канагатлайтаган уьйкен эмлев медициналык орталыгын курув бойынша меценат проектин яшавга шыгармага аьзир экенин белгилеген. Республика вице-премьери Мурад Казиев Избербашта 300 орынлы больницадынъ курылысы акында хабарлады. Докладшыды тынълап болып, регион етекшиси ДР Оькиметининъ Председатели Абдулмуслим Абдулмуслимовка бу курылысты оьз тергеви астына алмага эм куьн сайын юритилетаган куллыклар акында ога билдируьвди тапшырган. Йыйында солай ок республика вице-премьери Муслим Телякавов ортак билимлендируьв учреждениелерининъ капиталлык ярастырув программасынынъ яшавга шыгарылувы акында хабарлаган. Республикалык бюджетининъ 2022-нши йылда толтырылувы акында оьзининъ шыгып соьйлевинде Дагестан Республикасынынъ финанслар министри Юнус Саадуев билдируьв этти.