Дагестан Республикасынынъ Ногай районында Токио каласында озган Олимпиада ойынларынынъ бокс бойынша чемпионы Альберт Батыргазиевти эм сол ойынларынынъ катнасувшысы, Азиядынъ эки кере чемпионы Юсуп Батырмурзаевти хош алдылар.

Терекли-Мектеб авылга кирген ерде йогары дережели конакларды Ногай районынынъ аькимбасы Мухтарбий Аджеков, онынъ орынбасары Баймагомед Ярлыкапов, Ногай район Депутатлар йыйынынынъ председатели Джамалутдин Эсиргепов, Терекли-Мектеб авыл аькимбасы Зейдулла Аджибайрамов, республикалык эм район организацияларынынъ етекшилери, бизнесменлер эм район яшавшылары карсы алдылар. Конакларга ярасыкланган термеде ногай халкынынъ аслары ман сыпыра аьзирленген эди. Термединъ ишинде Альберт Батыргазиев Олимпиада ойынларында кайтип катнасканы акында хабарлады.
– Мен халкымнынъ коьтергишлевин сездим, сол мага алдыга бармага дем эм салган мырадыма етпеге куьш берди. Ойынлар заманда социаллык тармакларда да мени туьрли эллерден эм оьз Аталыгым – Россиядан коьплеген аьдемлер коьтергишледилер. Мен мутып болмайман, кайтип мени Дагестан Республикасында, аэропортта хош алганын, кайдай коьп аьдемлер сонда йыйналганын. Мен уьшин кыйналганлар, мага Олимпиада ойынларында енъуьв тилегенлердинъ баьрисине де разылыгымды билдиремен. Тек сол зат уьшин енъмеге болаяк эди, – деп хабарлады чемпион термеде болганларга.

Сонъында байрам Терекли-Мектеб авыл маданият уьйининъ алдына коьшти. Район аькимбасы Мухтарбий Кошманбет увылы Аджеков спортсменлерди кутлады эм баргылар савгалады. Альберт Батыргазиевке каратылган соьзинде ол яс олимпиада чемпионы ХХХII яй Олимпиада ойынларынынъ тарихине ногай халкынынъ атын алтын аьриплер мен язганын эм соны ман тек ногай халкын, Дагестанды тувыл, савлай Россияды данъклатканын белгиледи. Район басшысы оьзининъ, муниципалитеттинъ организацияларынынъ етекшилерининъ, солай ок район фермерлерининъ эм бизнесменлерининъ атыннан Махачкала каласында квартирага сертификат эм ДР Ногай районынынъ «Сыйлы гражданини» деген атын шайытлайтаган удостоверение тапшырды.
Юсуп Батырмурзаевке бир миллион акшага сертификат берилди.
Ногай районынынъ Депутатлар йыйынынынъ председатели Джамалутдин Эсиргепов Альберт Батыргазиевке Ногай районынынъ «Сыйлы гражданини» деген ат берилгени акында депутатлар йыйыны ман алынган карарды окыды. Солай ок, кутлав соьзи мен Терекли-Мектеб авыл аькимбасы Зейдулла Аджибайрамов шыгып соьйледи. Ол Альберт Батыргазиевтинъ спорт баьтирлиги яс спортсменлерге енъуьвши болмага демевлик береди деди. Авыл аькимбасы эки спортсменлерге де Терекли-Мектебте ер участоклар тапшырды эм Альберт Батыргазиевтинъ атын авыл орамларынынъ бирисине берилееги акында билдирди.
Район Ясуьйкенлер советининъ председатели Альберттинъ атасына Фатима Каноковадынъ кол ман тигилген казанкулак кыпшак тукымынынъ тамгасын, Альбертке кол ман тигилген коьйлегин тапшырды.
Махачкаладынъ имамы Мухаммад Атангуловтынъ айтувы ман, Олимпиадада куьресуьвде Альберт дуа окып, соны ман Кудайга оьз сенимин беркитти. Имам спортсменлерге киели Коран тапшырды. Куьнбатар авылында муннан бираз алдын заманда олимпиада чемпионына ногай йыныслы ат савгаланды.
Шатлыклы шарада катнаскан Альберттинъ атасы Ханбулат Батыргазиев баьрисине де онынъ увылын эм спортсмен Юсуп Батырмурзаевти соьйтип йылы хош алганы уьшин савбол айтты. Ол йыйылганларга, савлай район яшавшыларына ден савлык эм онъайлык йорады.
Концерт программасында патшалык фольклор-этнографиялык «Айланай» эм балалар «Карлыгашлар» ансамбльлерининъ биювшилери катнастылар. Шатлыклы шарады Дагестан Республикасынынъ ат казанган маданият куллыкшысы Сабират Абубекерова юритти.
Шара оьтуьв мезгилде баьри кавыфсызлык амаллар алынды. Шаралар кырда оьткерилди.
Эльмира Кожаева, «Шоьл тавысы» республикалык газетасынынъ бас редакторы.