Янъыларда крым-татар калемдасларымыздынъ шакырувы ман Симферополь каласында баспаланатаган «Янъы дюнья» деген газетасынынъ редакциясында конакта болдык. Газетадынъ бас редакторы, шаир, язувшы, коьшируьвши Сейран Сулейман бизди йылы йолыгып алды, баспа амалынынъ тарихи, аьлиги аьли, басшылайтаган коллективи акында хабарлады.

Сейран Сулейман «Уч, къальбим», «Сенинъ козьлеринъде йылдызлар корьдим», «Джемден бир авуч» деген ятлавлар йыйынтыкларынынъ авторы болады. Онынъ шыгармалары туьрк, украин, азербайджан тиллерине коьширилип, коьплеген йыйынтыкларында эм журналларында баспаланганлар. Йолыгыстынъ барысында Сейран бей бизге оьзининъ китаплерин, «Янъы дюнья» газетасынынъ номерлерин савгалады.
«Маьметекей» адабиат-суьвретлев журналынынъ бас редакторы, «Ногай давысы» республикалык газетасынынъ хабаршысы Асан Найманов конакбайларга бизим баспа амаллары акында хабарлады, филология илмилерининъ кандидаты Аминат Капланова оьзининъ монографиясын, суьвретши бавырдасымыз Ислам Курманов «Ногай» деген суьвретин савгаладылар.
Йолыгыс айлак йылы болып озды. Биз кардаш крым-татар калемдасларымыз бан тар байланыс тутпага соьйлесип аманластык.
Суьвретте: йолыгыстан коьринис.