Янъыларда «Дагестаннынъ йыл окытувшысы-2021» деген ярыстынъ зоналык кезеги Кизляр районындагы Расул Гамзатов атындагы Краснооктябрьский орта мектебинде уйгынланып оьтти. Дагестаннынъ сырт зоналык кезегинде 10 муниципаллык районларыннан катнасувшылары ортакшылык эттилер. Эки куьн узагында кеспили тоьрешилери катнасувшыларды «Методический мир» деген эм «Учебное занятие» деген эки кезеклерининъ эки номинациялары бойынша бааладылар.

Биринши куьн ярыс катнасувшылары оьзлерининъ методикалык сулыпларын савлай окытувшылык аьрекети бойынша кулланып келген ийги методикалык макалаларын кулланып усташа коьрсеттилер. Экинши куьн ярыс катнасувшылары дерислер озгардылар. Оннан сонъ, сол эки куьн тамамлары бойынша, енъуьвшилердинъ атлары белгили болдылар. Ярыста Кизляр районыннан Елена Агапова биринши орынга, Ногай районымыздынъ Терекли-Мектеб авылынынъ Кадрия атындагы мектебининъ баслангыш классларынынъ окытувшысы Айшат Даирова экинши орынга тийисли болдылар. Ярыстынъ положениеси мен келисте, сонынъ уьш орынлары уьш катнасувшылары арасында боьлинди. Айтпага, Новолак районыннан Зара Омарова, Тарумов районынынъ Ново-Дмитриевка авыл орта мектебиннен баслангыш классларынынъ окытувшысы, ногай кызымыз Мархава Юлакаева эм Хасавюрт районыннан Марина Газиева 3-нши орынларына тийисли этилдилер.
Кизляр районынынъ аькимбасы Аким Микиров финалшыларга гуьл байламларын эм сертификатларын тапшырды. Солай болып, район аькимбасы шарадынъ шатлыклы ашылувында ярыс катнасувшыларын кутлай келип, аьлиги замандагы ямагат яшавында окытувшылардынъ исининъ маьнелигин белгиледи, баска болып, ол баьри катнасувшыларына да ярыс тамамына карамастан, дайым оьз исине алаллыкты эм усталыгынынъ оьрленуьвин талаплаган окытувшылык кесписининъ йогары оьлшемине дайым келисип келгенин йорады.
Ярыс катнасувшыларын «Кизлярский район» МР Депутатлар Йыйынынынъ председатели Нурудин Кахиров та кутлады.
Ярыс катнасувшыларына деп, баьри ийги аьллер де туьзилген эдилер. Шарага йыйылган конаклар ярыс катнасувшыларына бек ийги эм онъайлы аьллер туьзилгени акында белгиледилер. Боьтен де, олардынъ эслерин мектеб музейининъ этнографиялык эм янлы муьйиси (живой уголок) оьзине каратты.
Оьткен шара ярыс катнасувшыларынынъ окытувшылык билимлерининъ майданы болып калмай, сынав, кеспилик эм досласув байланысларын туьзуьв бойынша сокпак та болды.
Суьвретте: шара катнасувшылары.