Уьстимиздеги йылдынъ навруз айынынъ 22-нши куьниннен алып 24-нши куьнине дейим Ногай районынынъ «Ногай Эл» балалар бавында Ногай район кезегинде «Дагестан Республикасынынъ йыл тербиялавшысы – 2022», шарасы болып озды. Шарада Ногай районынынъ туьрли авылларындагы балалар бавларыннан тербиялавшылар ортакшылык эттилер: Терекли-Мектебтинъ «Айсылув» балалар бавыннан – Гульмира Еналиевна Улубиева, «Юлдыз» балалар бавыннан – Румия Маушевна Кулушева, «Ногай Эл» балалар бавыннан – Отебике Куруптурсуновна Акмурзаева, Нариман авылынынъ «Шолпан» балалар бавынынъ тербиялавшысы – Альфия Алибековна Асанова эм Червленные Буруны авылынынъ «Кызыл-Гуьл» балалар бавынынъ тербиялавшысы Насият Эльгайтаровна Шоматова.

Шара катнасувшылары «Дагестан Республикасынынъ йыл тербиялавшысы – 2022» деген ийги атты казанув уьшин, белгиленген йорыкларга коьре, оьзлерининъ портфолиосын, кайдай ниет пен шарага келгенин соьйленисли билдирмеге, оьз иси бойынша сулыбы ман боьлиспеге эм балалар ман катнасын коьрсетпеге керек эди. Аьр бир тербиялавшы оьз алдына кызыклы эм билимли экенин коьрмей болмадык. Аьр бирисининъ шарага ийги аьзирлиги де сезилди.
Шарада катнасканлардынъ оьнерлерине белги беруьвшилердинъ эслерин «Айсылув» балалар бавынынъ тербиялавшысы Гульмира Енали кызы Улубиевадынъ берген дериси каратты. Онынъ дерисинде Мери Поппинс балалар ман катран ман ислеп, мастер-класс коьрсетти. Эртегилер дуныясы ман кыдыртып, балалардынъ соьйленисли тилин оьрлендируьв оьнери мен Румия Мауш кызы Кулушева таныстырды. Балаларды журналист кесписи мен таныстырып, соьйленисли тыныс алув оьнери мен Альфия Алибековна Асанова, «Сондай пайдалы таслар» деп атап, балаларды туз эм туьрли туьсли бояклар ман ясап уьйретти Насият Эльгайтаровна Шоматова, эртегилер аркалы балалардынъ финанс ягыннан оьнерин оьрлендирди Отебике Куруптурсуновна Акмурзаева.
Уьш куьн узагында «Дагестан Республикасынынъ йыл тербиялавшысы – 2022» шарасынынъ катнасувшыларынынъ оьнерлерине белги берген жюри агзалары бек разы болып калдылар. Тек аьр бир шарада ийгилерден ийгиди белгилемеге керек болганнан сонъ, аьдеттен тайып болмаймыз. Шара тамамларына коьре, «Дагестан Республикасынынъ йыл тербиялавшысы – 2022» деген ийги атка «Айсылув» балалар бавынынъ тербиялавшысы Гульмира Енали кызы Улубиева тийисли болды. Оннан баскалай, экинши орынга «Шолпан» балалар бавынынъ тербиялавшысы Альфия Алибековна Асанова эм уьшинши орынга «Ногай Эл» балалар бавынынъ куллыкшысы Отебике Куруптурсуновна Акмурзаева тийисли болдылар.
Шарадынъ барысында айырым номинациялар бойынша да енъуьвшилер белгилендилер. Айтпага, энъ ийги мастер-классты «Юлдыз» балалар бавынынъ тербиялавшысы Румия Мауш кызы Кулушева, «Кызыл-Гуьл» балалар бавынынъ куллыкшысы Насият Эльгайтар кызы Шоматова болса, шара ашылувында оьзининъ менлигин коьрсеткен кезегинде энъ де ийги эди.
Ногай район кезегинде оьткен «Йыл тербиялавшысы – 2022» шарасы бек кызыклы оьтти. Сол ийги атка тийисли болган Гульмира Улубиева энди Ногай районынынъ атын республика кезегинде яклаяк. Алдыда ога тек енъуьвди йораймыз.
Г.Курганова.
Суьвретте: «Йыл тербиялавшысы – 2022» шарасынынъ катнасувшысы.