Аьр йылда да 27-нши декабрьде Россия Президентининъ Указына коьре (26.12.1995 й., №1306) РФ Куткарувшысынынъ куьни белгиленеди. 1990-ншы йылдынъ 27-нши декабринде РСФСР Министрлер Советининъ токтасы ман Россия Куткарувшыларынынъ корпусы (сонъында МЧС деп аталып) туьзилген. Сол токтас кабыл этилуьв куьни россия куткарувшыларынынъ кеспи куьни деп саналады.
Россияда МЧС деген туьрли кепли баьле-казалар (табиатлык, техногенлик эм эпидемиялык) дайым да коьп болатаган ман байланыста туьзилген. Солардынъ сырагысында аьдемлер кателенедилер, биревлер оьледилер, материаллык баалыклар йок этилинеди. Ондай баьле-казалар йолларда коьлик юрисинде эм сувлар уьстинде, турак уьйлерде, турак уьйлерде от туьсуьвде, промышленность объектлеринде, атылмай калган савыт-садакларды излестирип, оларды яравсыз этуьвде, химиялык эм радиоактивли затлардан ерди тазалавда, терроризм орын тапкан ерлерде, куьшли еллер эсип, явын-шашын да (ямгырлар, боранлар, кар куьртиклери) болады.
МЧС ведомствосы излес- тируьв-куткарув ислер озгарувда бас орынды тутады. Коьмек керек ерлерге (от туьсуьвде, бузылган курылыслар, авариялар, сув ман бийленген эм сондай баска ерлерге) онынъ куллыкшылары биринши болып келедилер, баьле-казага туьскенлерге ярдам кереги акында билдируьвлерге сонда ок яваплайдылар.
МЧС ведомствосы куллыкшылары ман коьп санлы излестируьв-куткарув ислер озгарылган, 2,5 миллионнан артык аьдемлер оьлимнен куткарылганлар, юзлеген мынъ аьдемлерге коьмек этилген. Бу ведомстводынъ аьрекет этуьв йыллар узагында 1,7 миллионнан артык атылмага болаяк затлар табылган ерлер тазаланган, баьриси 5 миллионнан артык аьдемлерге коьмек этилген, ер юзининъ туьрли баьле-казалар болган ерлерден мынълаган россиянлылар коьширилгенлер.
Россия куткарувшылары бириншилер санында коьмек керек шет эллерге де етедилер. Уьйкен коьмеги тийген олардынъ шет эллерде атылмага болаяк кавыфлы затлар табылган ерлерде. 1996-ншы йылдан алып бу тармакта отыздан артык халклар ара проектлер яшавга шыгарылган. Оннан баска болып, бизим куткарувшылар шет эллер ерлеринде табиатлык от туьсуьвлерди тымдырувда эм яшавшылар пунктларын коршалавда катнасадылар.
Буьгуьнги кеспи байрамы ман байланысларга Россиядынъ баьри куткарувшылары да – территориаллык, муниципаллык, байыр куткарувшы службасын юритетаганлар, ямагат куткарувшы организациялар эм МЧС – тийислилер.
Аьдетинше, сол куьнге багысланып шатлыклы шаралар эм байрам концертлери оьтедилер, туьрли кепли куткарувшы службалар куллыкшыларын власть органлар ваькиллери, ис йолдаслары эм оьз етекшилиги кутлайдылар, коьлем информациялар тармагында оларга фильмлер эм коьрсетуьвлер багысланады.
