Куьнбатар эллери бизим экономикага карсы коьплеген санкциялар киргисткен аьлиги енъил болмаган заманларда республикадынъ, сонынъ санында Ногай районымыздынъ авыл хозяйство тармагына тек былтыргы коьрсетимлерди саклап калмай, солай ок солардынъ оьлшемлерин оьстируьв акында каьр шекпеге туьседи.

Россиядынъ эм Дагестаннынъ етекшилери буьгуьнлерде аталык производительлерин, олай дегени, авыл ериндеги фермерлерди де колтыклав уьшин хыйлы амаллар коьруьви сенимлик бермей болмайды. Соны ман эндигиси элимиздинъ экономикасын, агропромышленность комплексин, дурысында, оьзимиздинъ анъламымызды тамырыннан оьрлентуьв заманы басланды демеге керекпиз. Биз тек оьзимиз оьзимизди, аьелимизди, элимизди канагатламага болаякпыз эм бир де баскаларга сенмеге керек тувылмыз.
Муннан хыйлы заман артта, 2003-нши йылда, Куьнбатар авылындагы Рамберди Койлакаевтинъ «Камиль» деген аьел фермасы курылып, тувар малды оьстируьв эм беслев мен каьр шегип баслаган. 2018-нши йылда ол Дагестан Республикасынынъ Авыл хозяйство эм тамак-азык министерствосынынъ грантын алган. Оьзининъ хозяйствосында асыллаган эт эм суьт продукциясын район еринде, Сырт Кавказ республикаларында сатады. Онынъ продукциясы йогары сапаты ман белгиленеди. Соннан себеп болар, Дагестан Аькимбасы Сергей Меликов оьзининъ бир соьзинде республикада энъ де ийги эт эм ийги емис-ясылша оьстириледи деп айтканы.
– Фермер аьрекетимизди армаган оьрлентип бараякпыз. Бизде келеекте байыр производствомызды арттырув, аьзирленетаган продукциямыздынъ оьлшемин оьстируьв бойынша хыйлы планларымыз бар, – дейди Рамберди Койлакаев. – Элимиз этсиз калмас.
Рамберди солай ок район эм республика ерлеринде оьткерилетаган баьри де авыл хозяйстволык ярмалыкларында таймастан катнасады.
М.Ханов.
Суьвретте: Рамберди Койлакаев.