Бу айдынъ басында Махачкалада КПРФ Дагестан республикалык боьлигининъ 17-нши эсап беруьв-сайлавлар конференциясынынъ 2-нши кезеги болып озган. Конференция куллыгында баьри район эм кала партия организацияларыннан 78 делегат, сонынъ санында КПРФ Ногай район комитетининъ делегатлары катнастылар.

Республика коммунистлерининъ йогары форумынынъ куьн йосыгында каралган баьри соравлар да быйыл 19-ншы сентябрьде Дагестан Республикасынынъ Халк Йыйынына депутатларды сайлавлар ман байланыслы эдилер. Солардынъ ишинде конференция делегатлары «ДР Халк Йыйынынынъ депутатларына КПРФ Дагестан республикалык боьлигиннен кандидатлардынъ сырасын коьрсетуьв акында» деп аталган бас соравды да ойластылар. Сонынъ сырагысында республикалык парламентининъ депутатларына кандидатлар баьри де 62 сайлав округлары бойынша аталдылар. Солардынъ арасында форумнынъ делегатлары Сырт сайлав округы бо- йынша ДР Халк Йыйынына депутатларга кандидатлар этип КПРФ Ногай РК 1-нши секретари Мурзадин Авезовты, КПРФ Ногай РК секретари Абрек-Заур Лукмановты, Карагас авыл баслангыш партия организациясынынъ секретари Темирхан Сатыровты коьрсеттилер. Бу сорав, оннан алдын кандидатлардынъ оьзлери мен ойласылып, партия райкомынынъ кезекли бюросында каралган эди.
Дагестан коммунистлерининъ йогары форумынынъ 2-нши кезегинде КПРФ Орталык Комитетининъ секретари К.Тайсаев катнаскан эм шыгып соьйлеген.
КПРФ Ногай РК пресс-службасы.
Суьвретте: М.Авезов.