Янъыларда Москвадынъ туьбиндеги Наро-Фоминск каласында эркин куьрес бойынша Россия чемпионатында катнасып, 68 килограмм шеккиси мен чемпион болган ердесимиз, «Ногайстан» деген комплексли спорт школасынынъ тербияланувшысы Амаль Керейтовты район яшавшылары куванышлы йолыктылар.
Чемпионды йолыгувга Карашай-Шеркеш Республикасынынъ Ногай район администрациясынынъ аькимбасынынъ куллыгын юритуьвши Руслан Кумратов, Ногай район администрациясынынъ аькимбасынынъ орынбасары Виктор Унаджев, Ногай районынынъ аькимбасы – Советтинъ председатели Рустам Кукаев, район Советининъ депутатлары, «Единая Россия» партиясынынъ Ногай районы бойынша боьлигининъ председатели Ренат Камбаров, районымыздынъ маданият тармагынынъ куллыкшылары, айтпага, КЧР маданиятынынъ сыйлы аьрекетшиси Нанык Сикалиева, «Акбилек» ансамблининъ етекшиси Юлдуз Дышекова, спорт аьрекетшилери, ясуьйкенлер йыйылдылар. Сыйлы чемпионды эм баьри йыйылганларды Н.Сикалиевадынъ кобызыннан шыккан шыктай таза ногай анълары коьнъиллендирди. Амаль Керейтовты Ногай район администрациясынынъ аькимбасынынъ куллыгын юритуьвшиси Руслан Кумратов чемпион атына тийисли болганы ман йылы кутлады эм алдыдагы Европа чемпионатында да енъуьвди сагынды.
Сондай йоравлары ман Ногай район администрациясынынъ аькимбасынынъ орынбасары Виктор Унаджев боьлисти.
– Буьгуьнгидей болып, ногай халкымызды, кардаш-тувганларынъды аьр дайым янъы йогары енъуьвлеринъ мен кувандырып турганынъды сагынаман. Етимислеринъ сансыз болсынлар. Тренерлеринъ Эльдар Каракаевтинъ эм Билял Матакаевтинъ каныгыслы шалысувлары буьгуьнлерде онъ емислерин берди. Сыйлы тренерлер, сизге куьш-куватты сагынаман, – деди Виктор Асанович хошлав соьзинде.
Оннан сонъ баьриси де чемпионнынъ тувып-оьскен Адил-Халк авылына йолландылар. Ерли маданият уьйинде чемпионды оьрметлевге багысланган амаллама озды. Амалламады авылдынъ орта мектебининъ етекшиси Светлана Зитляужева юргистти. Ол йыйылганларды йылы хошлап, авыл администрациясынынъ аькимбасы Каплан Керейтовка соьзди берди:
– Буьгуьн халкымызда ийги куьн деп санайман. «Ногайстан» спорт школасынынъ тербияланувшысы Амаль Керейтов авылымыздынъ Ногай районынынъ, республикамыздынъ атын Россия оьлшеминде озган сынасларда айттырып, 68 килограмм шеккиси мен чемпион болып кайткан. Мен оны сол етимиси мен ак юректен кутлайман эм Амаль спортта энди де атын дуныяга айттыраягына сенемен, – деди Каплан Адильевич эм Амаль Керейтовты, тренерлери Эльдар Каракаевти, Билял Матакаевти Разылык хатлары ман савгалады.
– Соьзсиз де, буьгуьн ногай халкымыз уьшин айлак куванышлы куьн деп санайман. Амаль, сени Россиядынъ чемпионы болганынъ ман кутлайман. Алдыда сен Европа алдышылыгына йолланаяксынъ. Мен билип, республикамыздынъ ногайларыннан буьгуьнге дейим олимпия спорт туьрлисинде бирев де катнаспаган. Сен биринши болаяксынъ, – деп беркитти Руслан Исхакович. Сахнада Амальдинъ тренерлери Эльдар Каракаев эм Билял Матакаев соьйледилер. Оьз разылыкларын айттылар, Амальге алдыда уьйкен сенуьв этетаганлары акында билдирдилер.
Амалламадынъ барысында Амальдинъ класс етекшиси, эсаплав дерисиннен окытувшысы Аида Махмутова кутлады. Ол Амальге келеекте де йогары етимислерди сагынды.
Сонъ шарага келгенлерге муьсиревлигин Россиядынъ чемпионы болган Амаль Керейтов билдирди.
– Мен эркин куьрес пен алты яста каьрлеп баслаганман. Биринши тренерим – ДР ден савлык маданиятынынъ сыйлы куллыкшысы, эркин куьрес бойынша йогары дережели тренери Халил Кумратов болган. Халил Ибрагимович мени спорт дуныясынынъ кенъ йолларына шыгарды. Наро-Фоминсктеги чемпионатка да келип, яны авырыйтаганын коьрсетти. Мен ога бек разыман. Оннан сонъ уьйренуьвлеримди авылымыздынъ спорт школасынынъ тренери Хасан Зитляужевтинъ колында бардырдым. Аьлиги заманда «Ногайстан» КСШ-сынынъ Эркин-Халк авылындагы боьлигинде Эльдар Каракаевтинъ эм Билял Матакаевтинъ насихатларына таянып, спорттынъ сыхырларына уьйренуьвимди алдыга алып бараман. Тренерлеримнинъ аьр кайсысына уьйкен савболсынымды айтаман. Курал айынынъ сонъында Болгарияда оьтеек Европа чемпионатында енъмеге мырат этемен, – деп кызыклы боьлисти Амаль Керейтов.
Сондай болып тукымнынъ атыннан амалламадынъ катнасувшыларына каратылган разылык соьзлерин ясуьйкенимиз Сапар Керейтов айтты. Авыл маданият уьйининъ «Акбилек» ансамблининъ катнасувшылары сахнада оьнерли биювлери мен эм ярасык йырлары ман амалламады шынты байрамга айландырдылар.
Ызында баьриси де чемпионымыз бан бирге эстеликке суьвретке туьстилер. Аьперим, Амаль, алдыга!
А. Найманов.
Суьвретте: Амаль Керейтов.
Автордынъ алган суьврети.
