Бала – баьрине де ортак. Соьйтип, ердеслеримиздинъ саьбийлери уьстинликлерге етискенин эситсек, суьйинмей болмаймыз. Боьтен де, ногайымнынъ атын баска ерлерде данък эткен йигитлеримиздинъ акында оьктемлик пен язамыз.
Айнулла эм Гульнара Кургановлар Ямало-Ненецкий автономлы округынынъ Лабытнанги каласында коьплеген йыллар яшайдылар. Кургановлардынъ уьйкен аьели (олар 4 бала оьстиредилер) балаларын билимли болсын деп, туьрли кружокларга, секцияларга юритеди. Каплан – уьйде энъ биринши бала, мен ойлайман, келеекте ол кишкей карындасларына тирев эм коршалавшы болар.
Каплан Лабытнанги каласынынъ гимназиясында окыйды, бу мектебте английс эм француз тиллерине маьне бериледи. Биринши класстан алып тек бесевлерге окыйтаган бала округ, кала бойынша озгарылатаган конкурсларда, олимпиадаларда катнасып, биринши орынларды алады. Доьрт ясыннан алып Каплан греко-римский куьрес пен кызыксынады, бу спорт бойынша секцияга юреди. Яс спортсмен коьплеген ярысларда катнасып, енъуьвши болган. Ызгы йылларда шатраш ойыны ман да кызыксынады, баска калаларда болатаган турнирлерде оьз усталыгын коьрсетеди. Соьйтип, ол озган йыл шатраш бойынша кала Бириншилигинде баргылы орынларды алган, медальлерге тийисли болган.
Каплан экология, география, технология, орыс тили, обществознание сабаклары бойынша Савлайроссиялык окувшылар уьшин олимпиадаларынынъ енъуьвшиси йыл сайын болып турады. Сол затты окувшыдынъ коьплеген грамоталары ыспатлайды. Каплан Курганов «Ян экологиясы» деп аталган округ бойынша яттан ятлав окувшылардынъ конкурсынынъ енъуьвшиси болды. Солай ок ол «Енъуьв асабалары» деп аталган согыс поэзия эм йыр конкурсында биринши орынды алды. Йыл сайын Каплан «Тири классика» конкурсында катнасады.
Каплан – йигерли, тек алдыга ымтылган кеде. Сол затты онынъ аты да баьримизге де айтып туры. Мен ойлайман, ат атаган заманда, баладынъ ясуьйкенлери оны капландай оьктем, йигерли болсын деп атагандыр. Келеекте ол МГИМО окув ошагында окымага ниетленеди. Тезден Каплан 14 ясына толаяк, Алла буйыртса, Россия гражданини деген шайытлама ыслаяк колына. Мен ак юректен яс ердесимизге сол атты сый ман, абырай ман юритип, элимиздинъ, халкымыздынъ данъклы йигити болганын сагынаман. Айнулла эм Гульнара Кургановларга аьелинде тек ийгиликлер йорайман, саьбийлери оьсип, оларга куьез аькелсин, наьсипли болсынлар. Аьлиги заманда баьримизге де керек ден савлыкты йорамага суьемен.
Г.Бекмуратова.
Суьвретте: Каплан Курганов.
