Озган юма сонъгы куьн район мектеблеринде ызгы занъ согылды. Коьплеген окувшылар тувган мектеби мен аманластылар. Карагас авылынынъ К.Кидирниязов атындагы орта мектебинде де шатлыклы шара озды. Ярасык кийимлер кийген окувшылар, ата-аналар, конаклар мектебтинъ азбарында йыйылганлар. Окув йылы биткени акында билдирген байракты туьсирмеге ыхтыяр Россия Федерациясынынъ Сыйлы куллыкшысы, окытувшылык тармагынынъ ветераны К.Сатыровага, мектеб активистлери Даниял Кошановка, Аминат Капитуллаевага, Амина Османовага тапшырылды.
Мага да Карагас авылына сол куьн ийги ниет пен бармага туьсти. «Шоьл тавысы» республикалык газетасы «Енъуьв уьшин атамызга – савбол!» деп аталган Уллы Енъуьвдинъ 77-нши йыллыгына багысланган сочинениелер конкурсын озгарды. Карагас авыл мектебининъ окувшылары бу конкурста катнасып, баргылы орынларды алдылар. Олар – Дженнет Карагулова, Амина Ильясова, Талифа Самединова, Лейла Рашидова. Айырым савбол адабиат «Тулпар» кружогынынъ етекшиси, шаир Салимет Ахмат кызы Майлыбаевага айтылды.
Быйылгы выпускниклер – 11-нши класс (класс етекшиси А.Сарсеева) эм 9-ншы класс (класс етекшиси Н.Аджигельдиева) – ызгы занъ куьнин коьнъиллериндеги туьрли сезимлер мен карсы алдылар. Олардынъ кайбириси буьгуьнлерде яшавдынъ кенъ йолына абытлайдылар, бакты оларды туьрли йоллар ман алып барар, сол йолларда буьгуьнги окувшылар оьз сокпагын тапса, сол зат окытувшыларына, ата-аналарына уьйкен куьез болар деп ойлайман.
Выпускниклерге кутлав соьзлерин мектеб директоры Насипхан Багаудин кызы Шураева айтты. Солай ок конак болып келген мектеб выпускниги, Ногай районынынъ Депутатлар Йыйынынынъ депутаты Рустам Байманбетов шыгып соьйледи. Насихат йоравлардынъ маьнеси – яшавда ийги аьдем болып, уьстинликлерге етисип, авылдынъ, мектебтинъ атын оьктемлик пен данъклатув. Кутлав соьзи мен солай ок биринши окытувшылар, ата-аналар шыгып соьйледилер. Выпускниклер окытувшыларына оьз разылыгын билдирдилер.
Ийги окув эм иси уьшин выпускниклерге эм окытувшыларга Сый грамоталар тапшырылды. Ызгы занъды 1-нши классынынъ окувшылары Карим Капашов эм Айдан Агабалаева, 11-нши классынынъ окувшылары Салият Аджимусаева, Арина Карайдарова, Джамал Оразбаев бердилер.
Алдыда аьли де сынавлар бар, биз выпускниклерге уьстинликлер йораймыз.
Г.Бекмуратова.
Суьвретте: Карагас авылында ызгы занъ.
